Politika na Boneiro ta drentando den un fase di strukturashon nobo ku e anunsio di un partido polítiko ku a lansa su mes den pura pura: Partido Animo, liderá pa e konosí ex-gedeputeerde Nina den Heyer.
Mientrastantu ku e sede prinsipal ta keda kla na Tera Kòrà pa su lansamentu ofisial den luna di sèptèmber, opinion públiko i analistanan polítiko ta kuestioná e movementu i e kambio konstante di partido di e líder aki. Esaki ta hinka e debate riba si e paso akí ta representá un berdadero kambio pa e pueblo òf simplemente un lucha pa mantenemiento di poder individual.
Nina den Heyer tabata miembro di partido MPB (Movementu di Pueblo Boneriano) for di rònt di 2016 te ku 2022. Na 2016 el a drenta polítika aktivo i a bira diputado pa MPB, i na 2019 el a partisipá ku e partido ei komo kabes di lista i e stemmentrekker mas grandi. Na yüli 2022 el a anunsiá ku e ta baha for di polítika aktivo. Ora el a bolbe bek den kolumna di gobièrnu komo diputado mas despues, na òktober 2023, el a haci esaki komo un vakgedeputeerde apolítiko bou di e koalishon guiá pa Partido Demokrátiko (PDB), maske e no tabata miembro di PDB mes. Den su karera polítiko, Nina den Heyer nunka tabata miembro di PDB; semper su afiliashon polítiko tabata mará na MPB. Nina den Heyer a hunga e polítika di “avestrus, gaña muri pa biba bek”, ya ku maske e no ta líder di ningun partido, tòg e ta karga e vishon di su promé partido.
Practicamente , por bisa ku Den Heyer a keda sin aktividat polítiko pa despues bolbe bek manera un avestrus. Aunke ta partido PDB a dun’é e oportunidat pa drenta bek den gobièrnu bou di nan aliansa, krítikonan ta apuntá ku e ta operando ku un agenda di MPB bou di su brasa. Tin ku ta puntra nan mes: Kisas Nina ta e strategia pa debilitá partidonan pa MPB bin bek kompletu? Den e pueblo Boneriano tin diferente pensamentu i preokupashon riba gobernashon, unda hopi ta sinti ku e enfoke no ta riba traha pa Boneiro, sino riba risibí poder. Pa e mes motibo aki, den e islanan di Reino Hulandes awor tin hopi wowo poní riba kiko lo pasa na Boneiro i kiko e Bonerianonan ta para pe.
Pa hopi observador, e kreadónan di Animo ta bini despues di un sèrie di movementu polítiko caminda Den Heyer a “bula kurá” mas di un biaha. Despues di tabata e kara prinsipal i e mayor ganado di voto pa MPB pa dos eleksekion konsekutivo, el a aparta su mes di e partido blauw, pero no ta konosí si berdaderamente el a laga e man di partido MPB kompletamente los. Anteriormente, su aliansa táktiko i struktural a hib’é na asosiahon den un forma di gobernashon ku PDB, pero realmente e no ta un polítiko di PDB i no a mustra su kolor mas, pero tampoko e no ta laga e vishon di MPB un banda manera el a nenga ora el a sali for di MPB. Hopi ta ser bisa i kuestioná ku loke Nina a haci ta un estrategia hasi huntu ku MPB pa infiltrá den e partido mas stimá na Boneiro, esta Partido Demokrátiko (PDB).
Sinembargo, e instabilidat den e koalishonnan aki i e tenshonnan interno a pon’é keda sin un kas polítiko fihu, i awor a lanta su mesun plataformanan polítiko: Partido Animo.
Kiko ta e Diferensia Real di tin Bo Mesun Partido?
E kuestionamentu periodístiko di mas grandi ta lanta ora un polítiko no por visualisá un trabou struktural i duradero den formashonnan eksistente.
• Autonomia Total kontra Kompromiso: Den partidonan manera MPB òf PDB, desishonnan ta wordu sometí na un direktiva i konsensus en komun. Ku Animo, Den Heyer lo tin e kontrol absoluto riba e agenda polítiko i e selekshon di kandidato, eliminando frishonnan interno ku otronan.
• E Identidat di ‘Animo’: E reto grandi di Den Heyer lo ta di demostrá ku Animo no ta simplemente un vehíkulo electoral pa su persona, sino un partido institucionalisá ku un ideologia kla pa e pueblo.
E diskushon den kaya di Boneiro ta dividi. Di un banda, su simpatisantenan ta mira e paso aki komo un akto di kurashi; un forma di asumí responsabilidat direktu sin wordu manipulá pa e interesnan tradisional di e partidonan bieu. Pa nan, e “bula kurá” tabata un señal di prinsipio i un rechasamentu di mal maneho struktural.
Di otro banda, e krítikonan ta señala ku e falta di kapasidat pa traha den ekipo den otro partidonan ta kontraproduktivo pa e stabilidat di e eilandgebied. For di e perspekstiva aki, e kambio di partido pa partido i awor e kreadónan di un partido propio por wordu interpretá komo un falta di lealtad institushonal, caminda e ego i e deseo di tin poder absoluto ta hunga e ròl prinsipal.
Ku e apertura di su sedenan proximamente, Nina den Heyer lo tin ku duna kuenta na e pueblo den luna di sèptèmber, no solamente riba su plan di gobernashon, sino tambe pakiko e no a logra konkretisá su vishon den e partidonan polítiko anterior. E elektorado di Boneiro, ku ya kaba ta kansá di e krisisnan struktural den gobernashon, lo mester disidí si e Animo nobo aki ta un lùz di speransa òf simplemente mas di e mesun polítika di semper unda ku ta buskando poder.