Featured Bonaire

Businesspark ta organisá eksitoso kurso tokante merkadeo


Businesspark durante último simannan a organisá su promé seri di kurso tokante merkadeo pa empresarionan lokal. Nadia Dabboussi, Emilayla Coffi i Xenah Cicilia a duna e treinen a den un seri di tres anochi.  Mas ku 45 empresario lokal a partisipá.

E kurso tokante merkadeo a keda repartí den tres anochi. E promé anochi tabata na enkargo di Nadia Dabboussi ku a trata e tópiko di “branding”: kiko “branding” por nifiká pa bo negoshi i dikon ta importante pa bo negoshi keda presentá semper uniformá. Durante e di dos anochi a Emilayla Coffie a trata e tópiko di strategia. Emilayla a elaborá tokante importansia di strategia i kon empresarionan por formulá e mihó strategia di merkadeo pa nan negoshi por ta eksitoso. E último anochi tabata na enkargo di Xenah Cicilia, kende a trata e tópiko yamá “next level”: kon pa hiba bo negoshi na e siguiente nivel. Akí a amplia riba “kon pa bende bo kos, kiko bo kos ta i unda por haña bo kos”. E grupo di mas ku 45 empresario presente a indiká di a keda hopi motivá i inspirá. Kada anochi di kurso a chispa algu pa mehorá den nan negoshi.

E kordinadó di Businesspark ku a organisá e kurso, Jermainy Diaz, ta kontentu ku e resultado i ku e interes pa e kursonan. “Tabatin hopi interes pa e kursonan di merkadeo, asta e sitio a resultá muchu chikitu, ku nos mester a bai Kámara di Komèrsio pa por haña un sala mas grandi. Pa nos tabata importante pa brinda e empresarionan na Businesspark, i tambe e otro empresarionan lokal ku tabata t’ei, informashon relevante i e mihó konsehonan di merkadeo posibel. E meta tabata pa krea un espasio kaminda empresarionan hóben i lokal por a bini huntu, siña i konektá ku otro, i nos a logra esaki”, segun Jermainy Diaz, kordinadó di Businesspark.

E intenshon di Businesspark ta pa den futuro sigui brinda treinen i kurso tokante tópikonan ku empresarionan lokal ta sinti falta di dje. Pa den promé kuartal di 2023 tin e di dos kurso planiá ku probablemente lo bai ta tokante finansa. Esaki lo kubri temanan manera impuesto i atministrashon. Finansa tabata un di e temanan ku mayoria empresario presente a indiká di kier amplia nan konosementu riba dje.

Segun diputado di desaroyo ekonómiko Hennyson Thielman: “Gobièrnu ta apoyá desaroyo di tur empresario lokal, i di formanan asina’ki ke keda kontribuí na esaki. Businesspark a duna un kurso di merkadeo riba nivel haltu ku nos por ta orguyoso di dje. Nos kier keda stimulá e empresarionan pa pensa grandi i pa e empresarionan no solamente kompará nan mes ku otro akí na Boneiru, pero tambe fiha nan bista den region i asta riba nivel internashonal.’

Businesspark ta un sitio ku gobièrnu di Boneiru ta finansiá, kaminda empresarionan inskribí tin akseso na espasio pa ofisina, internèt, guia, kurso i treinen. Businesspark ta un sitio di trabou i enkuentro pa empresarionan pa siña di otro i inspirá otro. E ta un sitio tambe pa bou di guia profeshonal krea, manehá òf sigui desaroyá negoshinan eksitoso.

Pa mas informashon tokante Businesspark por tuma kontakto via email na empresa@bonairegov.com òf sigui nos riba facebook i instagram na Businesspark Bonaire.

Related posts

Pastor Marcel Balootje: Mantene bo comunion cu dios: juan 15:7

EA News Author

Un lider mester demostra respet y no instiga

EA News Author

Lider di Fraccion di MEP ta exihi pa bin un reunion den Parlamento di Aruba pa trata e accusacionnan di corrupcion

EA News Author

Leave a Comment