Bon dia yen di sabiduria den nos alegria ! Awor si ! “Wij zijn er bijna, we zijn er bijna, maar nog niet helemaal “. Nos ta asercando e fecha di 14 di December pa den oranan di anochi nos goza cu Ruthy su di tres One woman show :”Alegria di Ruthy 3″. Cas di Cultura ta cla pa ricibi tur bishitantenan di e bunita show aki, cu ta inclui musica, canto, baile y poesia. E tema “Holland-Aruba-Love with a touch of Christmas” of na nos dushi idioma :” E amor Hulanda-Aruba cu un toke di Pascu”. Nos team di musico y artistanan local ta cla pa brinda e publico cu lo bay ta presente, un show fabuloso ! Un show duuuuuushiiiii atrobe !!!
Nan ta bisa cu , sucu no sa gaba su mes, pero , nos tin cu duna Cesar locual ta di dje, esta, e elogio y aprecio pa henter nos team. E biaha aki, e show lo wordo carga musicalmente dor di e famoso futbolista musico profeshonal cu curason, cu 53 anja y pico den farandula otro anja, e gentil cabayero Amado Rosina riba keyboard. Si, e gran Amado Rosina di tempo di e banda Dedalavie, awe tocando steelpan y keyboard na hotel ketobay, cu su experiencianan den exterior trahando cu musiconan di taya, e.o. na Oti Festival, just pa menciona un chispa di Amado. Keda pendiente pa mas di Amado Rosina. Nos curason ta manda un brasa fuerte cu e mihor deseonan pa pronto recuperacion na otro Maestro grandi di musica, e pianista Albert Croes, cu a carga nos prome dos shownan. We love you Albert ! Nos lo tin e grandiosonan Jerry Diaz Jr. ariba guitarra , Mario Alberto Kelly Jr. ariba viool, y Stan Dabian y Ninjo Comenencia ariba tambor, maracca y tamborin. Nos tin varios nochinan di training trai lomba, ora cu nos a bini hunto den un dushi ambiente den Veranda Shon Johan, cu autonan pasando cu hendenan “curioso” cu kier a catch un chispa di nos preparashonnan andando. Nos cantantenan tambe ta cla :” E hulandes, tambe un gentil cabayero, Wim Steenhuis, cu no ta un desconosi aki na Aruba, su di dos cas. Victor El Duque Samuel, Ariana “Lady Ari” Koolman Chirino , Lady Ruth mes, y Mario Alberto Kelly cu ademas di toca viool , tambe lo deleita e publico cu su bunita vos den cancionnan di Pascu. Nos ta sumamente satisfecho con tur e trainingnan a bay bau supervision di e Maestro Amado Rosina.
Esnan cu a presencia y goza di Ruthy su prome dos shownan, lo keda impresiona un biaha mas cu un bunita variacion hopi agradabel. Nos show e biaha aki ta dedica na 3 amiga di Ruthy cu ya no tey mas cu nos fisicamente, pero si den mente, alma y curason :” Guisela Croes, Melanie Thiel y Gwendy Sneek”. Benta di tickets lo ta pa Animal Shelter. Nos ta gradici DCA, UNOCA, DHL, Optica Moderna , La Moderna , Aruba Bank, Flora Market, Go Cultura y e tremendo team di Cas di Cultura encabesa pa Omar Brown pa nan aporte y sosten. Danki pa kere den nos mesun talentonan local. Danki tambe na Sra. Vivian Lampe, Luty Martinez, Magda Nicolaas, Indra Balijn, Milly van Delden y Miriam Koolman pa nan bunita cooperacion y participacion y tambe na Alex y Irina Berkley pa cu nan bunita baile. E decor bunita di e stage lo ta den mannan magico y bendiciona di e multifacetico Jhon Freddy Montoya, y e carismatico artista Elizabeth Croes y su bunita yui muher Lisette. Nan ta mi team y sin nan no tin show. Nos show ta simpel sofistica, natural y yen di alegria ! Bo lo sintibo inspira , relaha y cu un smile ariba bo cara ! Ticknan ta obtenibel na Animal Shelter, Cas di Cultura, Boekhandel Van dorp y Plaza Bookshop na unicamente Afls. 15,- . Danki na tur esnan cu a busca nan ticket tempran, y si resta lo tin na porta na Cas di Cultura pa algun cu ta gusta warda te ultimo, pero nos no por priminti cuanto lo tin e anochi mes di 14 di December. Pesey nos ta recomenda pa buske awor pa bo no keda afor. E show ta cuminsa pa 8 or di anochi, riba e Diaranzon dia 14 di December 2022 y ora yega Cas di Cultura por drenta sinta den sala pa admira un bunita slide show hinka den otro pa e artista den tecnologia Omar Brown di Cas di Cultura , mientras ta carga pasenshi pa e ora di 8 or bati pa nos cuminsa. Nos ta cla p’e ! Boso tambe ? Bin celebra cu nos Ruthy su 50 anjanan den farandula, su di 65 cumpleanos y su di 45 aniversario di boda cu Johan Vrieswijk y yuda Animal Shelter cu nos mascotanan. Danki na prensa pa nan bunita cooperacion di publicacion di nos relato.
Shonnan tur, “stay safe” y “love you too “! Nos lo topa diaranzon 14 di December Dios mediante.
