Local

Competencia di Escultura Recicla a tuma luga na Hilton


Na honor di Earth Day den April, un competencia di escultura recicla a wordo organisa na Hilton Aruba Caribbean Resort & Casino recientemente. 

E iniciativa creativo anual aki a inclui un twist refrescante y original, cu enfasis riba escultura di animalnan di diferente tamaño, tur traha cu 100% materialnan recicla.

Cinco departamento a anuncia nan participacion. Un hunta di huradonan a disfruta di evaluacion di e trabao basa riba originalidad, inovacion, variedad di material, presentacion y nivel di dificultad.

E miembronan di Lagona Food & Beverage a yama bon bini na e huradonan na e coy pond na unda un shoco masha grandi mes, cu yama Pablo, a wordo inclui den e competencia, su plumanan traha for di pidanan di corki cu un boca di aluminium y blekinan machika cu a wordo uza pa su wowonan. E piesa tabata hopi detaya y bon termina. E entusiasmo di e team tabata contagioso.

Departamento di Recursonan Humano a dedica su presentacion na abehanan, creando un Reina Abeha masha grandi mes traha di paper-mâché geel cu preto, coffee stirrers di palo y pidanan di waya di coriente pa su pianan y halanan. E presentacion a inclui materialnan educativo y tambe informativo tocante bida di abehanan y nan importancia pa nos existencia.

E departamento di siguridad a opta pa crea un Shoco Owl cu hala di papel, nan presentacion tabata tocante beneficio di recycling y importancia pa reduci desperdicio.

Eforea Spa a recrea su logo di barbulet di flyers nan bieu, blekinan bashi di crema, materialnan di palo, waya electrico y otro tipo di cabuya. E trabao a wordo termina hopi bunita cu bastante atencion na detaye, cu un presentacion elocuente y preciso.

Miembronan di Pool & Beach a crea un bunita tortuga blauw cu berde dorna cu santo blanco. Nan a uza cups recicla, tapa di boter, y corkinan corta pa crea e shell, cu un cabes y rabo bon midi. Nan a informa e huradonan riba nan esfuerso pa yuda salba e populacion di tortuga den Caribe.

E huradonan a disfruta e proceso di duna punto mientras cu cada departamento a bini cu nan estilonan original, tecnica y materialnan, dedicando hopi tempo pa ehecuta nan plan.

Un reconocemento special ta bay na ganador Laguna Restaurant su team, kende su colaboracion tabata yena cu entusiasmo reflehando un team motiva y dedica.

E esculturanan a wordo presenta den e Lobby manera expo pa bishitantenan y miembronan di team, pa reconoce y mustra esfuerso di cada team cu a participa.

Related posts

Bishita di Beyesanan na FCVR

EA News Author

Gobernador boekhoudt ta entrega condecoracion na gerrit h. griffith

EA News Author

LNG lo baha prijs di coriente y trece posibilidadnan economico pa Aruba

EA News Author

Leave a Comment