E comision di accion cu ta encarga pa ehecuta e plan nacional cu ta atende cu e problematica di cacho riba caya a organisa e aña aki atrobe, despues di e exito grandi obteni na 2019, un Concurso di Pinta & Kleur cu a wordo lansa dia 4 di oktober, Dierendag.
Tur hende por download e formulario di informacion y participacion na www.specialprojectsaruba.org y print esaki pa muchanan por pinta y kleur na nan estilo pa participa na e concurso aki. Tambe por haya mas informacion y entrega e formulario di participacion na tur 4 MFA.
Pero e comision tawata en busca di un lugar central – pariba y pabow di brug – si por, cu ta habri pa oranan mas largo, na unda cu nos muchanan por wordo acerca y brinda e posibilidad pa haña sa mas di e campaña aki. E comision di accion a dicidi di acerca DOITCENTER pa ricibi formularionan di participacion for di muchanan cu kier participa, y ora e gerencia di DOITCENTER a tende di e plannan y e intencion tras di e Concurso di Pinta & Kleur, nan a keda encanta cu esaki y a brasa e proyecto. E comision di accion por a conta cu un tremendo colaboracion di nan parti: DOITCENTER a crea un kids corner special pa e concurso menciona, caminda muchanan por ricibi un formulario di participacion y nan por cuminsa cu nan arte eynan mes mientras cu nan mayornan ta haci compras. Ora mayornan caba di haci compras e muchanan ta bay cu nan formulario di participacion cas pa cabe na nan gusto. Muchanan mester kleur ambos banda di e formulario y tambe pinta nan mascota favorito.
Ultimo dia pa entrega e formulario di participacion lo ta dia 5 di November venidero. Dia 20 di November, cu ta Dia Internacional di Mucha, e ganadonan lo ricibi nan premionan.
Bandi di e 4 oficinanan di MFA cu por entrega e formularionan di participacion, e comision a haya cooperacion di Aruba Animal Shelter, Bestial, e Centro di Control di Cacho y e oficina di Gobierno Eddison Briesen na San Nicolas. Y claro, no por keda sin meciona cu por hiba e formularionan di participacion na e Costumer Service Desk di DOITCENTER tambe.
E meta di e Concurso di Pinta & Kleur ta pa yega cerca di e curason di nos muchanan na Aruba na un edad hopi jong pa asina logra conscientisa nan di e cuido di un mascota y di e responsabilidadnan di ta doño di un mascota ta trece cu ne; sea cu e mascota ta un pushi, un canario of un cacho.
Di e forma aki e comision ta spera di por planta e simia den nos ciudadanonan di futuro, pa tin respet y ta duna balor na nos mascotanan cual tambe ta forma parti di nos famia y di nos bida diario.
Ban encurasha nos muchanan y laga nan tur participa den e concurso aki.