Hof a declara sr. de Meza no admisibel den su apelacion. Hof ta basa su desishon riba hurisprudencia di e Hoge Raad, di cual e defensa tabata i ta keda di opinion cu no ta aplicable na Aruba. Lamentablemente no tin caminda di bai Hoge Raad den e procedura aki. Mas bien e ta parce cu Hof a dicidi di tuma e ‘easy way out’.
E tabata e intenshon di bai Corte Europeo di Derechonan Humano si e caso a sali negativo riba e contenido di e caso. Hof a evita esey cu e sentencia aki. Aunke Mike de Meza, hunto cu su team di defensa, no por ta di acuerdo cu e punto di bista di e Hof, mirando e tempo cu lo perde i no a trata e contenido di e caso, e caminda aki no lo wordo sigui aworaki.
Sr. de Meza y e team di defensa ta insisti den e argumentonan di riba cual Hof no a tuma un desishon i e team di defensa lo exigi un biaha mas di OM pa nan cambia nan postura incomprendibel i si ta nesesario lo bai corte, y si mester Hof bek. E momento ey, apesar cu tin otro opinion, lo sigui e caminda indica pa Hof, i si ta necesario despues si lo dirigi su mes na e Corte Europeo. Esey si Hof ta apoya ministerio publico den e violacionan continuo y grave di e derechonan di Sr. de Meza. E violacionan ta existi di nenga di notifica Sr. de Meza, manera art. 6 lid 3 di EVRM ta stipula, na un manera detalla di locual Sr. Meza ta ser sospecha, y tambe di viola su derecho riba un proceso hustu sin retraso innecesario y menos sin retraso intencional di e proceso penal, cu tur e consecuencianan esaki tin pa Sr. de Meza y tambe pa e interes general di Aruba. E postura di ministerio publico di viola e derechonan di sr. de Meza riba un proceso hustu na e manera grave aki ta un biaha mas incomprendibel y tambe ta sigui alimenta e desconfiansa den ministerio publico cu ya ta biba den nos comunidad.