Ayera den oranan di atardi Marisol Lopez Tromp hunto cu Holmo Henriquez ex lider di partido MAS a concretisa nan deal y e partido a pasa pa Marisol Lopez Tromp, e ex mandatario a dicidi di bay riba lista politico y e biaha aki a dicidi di bay como lider di MAS. Segun opinion di analistanan, e politico mes ta cobando su graf poco-poco cu cada cambio di e indole aki den su carera politico.
Despues di a participa den e ultimo eleccion di 2017 cu partido politico POR, conflictonan interno a pone cu directiva a sak’e afo y despues Conseho di Minister a perde confiansa den dje y a dun’e su retiro.
Recientemente por a mira un show prepara di simpatisantenan cu a yega su cas, pidiendo Marisol Lopez Tromp pa no bandona politica. Informacion cu ta sali for di su mesun circulo ta bisa cu e lo bay tuma partido MAS completamente over ya cu e fundado Holmo Henriquez no ta interesa pa keda den politica mas. Y esaki a keda confirma diahuebs atardi ora Holmo Henriquez a entrega petchi di lider di MAS na Marisol Lopez Tromp.
Despues cu su intencion pa cu PPA a cay na awa cu entrada di Lisette Malmberg, no a ked’e ningun otro opcion mas cu ta partido MAS cu no tabatin intencion pa bay eleccion. Aki ta caminda, segun e informacionnan, a gara y a cuminsa negociacion pa bay Notario y haci cambionan necesario y a haci esaki tambe y a bin e anuncio oficial dilanti Camara di Comercio Aruba.
Marisol Lopez Tromp ta tuma e partido completamente over cu su mesun hendenan. Despues di 24 aña den politica y cu a cambia di mayoria partido na Aruba, porfin e ta bira lider di un partido.
Pero analistanan ta kere cu esaki ta mustra mas un movecion cu lo nifica cu e ta cobando su graf mas, mirando tur e cambionan den su carera y con e votonan di dje a bin ta bahando. Alabes partidonan grandi ta keda partidonan grandi cu Marisol Lopez Tromp den pasado a traha cu ne y cu awe no tin bon laso mas.
E pregunta ta keda si acaso saca un asiento mes cua di e partidonan grand lo tin confiansa pa sinta cu ne. Esaki ta un caminda cu sigur ningun partidonan cu ya caba a traha cu e ex mandatario den pasado lo desea, Dificilmente lo habri porta pe un biaha mas despues di cada pasa 4 anja ta haci show na cada un di e partidonan aki y na final ta sake di e partido.
Lopez Tromp a drenta politica na aña 2007 manera un solda cu Movimento Electoral di Pueblo y a haya number 8. E aña ey el a haya 1538 voto. E cantidad di voto aki a haci cu el a bay ocupa number 4 riba e lista di e eleccion di 2001 y el a haya nada menos cu 4708 voto. Den e dos siguiente eleccionnan cu MEP el a ocupa no. 2 y a haya 4392 y 2880 voto na aña 2005 y 2009.
Problemanan interno den e partido geel, relaciona cu pensioen di Parlamentarionan a trece un kiebro y e partido core cu su persona, hunto cu Mervin Wyatt Ras e tempo ey. E siguiente eleccion el a participa cu partido berde AVP ocupando puesto no. 29 y a haya 1643 voto. Pero atrobe a surgi un problema cu Marisol, kende ta un politico individualista y no ta traha den team. Hasta a entrega un keho falso contra su colega Chris Dammers, kende el a acusa di a dal’e cual a resulta cu no tabata e caso, e la entrega un keho falso. El a bira independiente y prome cu e eleccion di 2017 el a negocia cu Otmar Oduber, kende tambe a bandona AVP, y asina el a bay ocupa puesto no. 3 riba lista di POR.
Marisol a drenta Parlamento y ora cu Otmar Oduber a retira, el a bira Minister. Pero un biaha mas a surgi problema cu partido cu a sak’e afo y despues cu e mes no a entrega retiro, Conseho di Minister a dicidi di dun’e su retiro na october, 2020 pa falta di confiansa.
E pregunta ta, un partido por ta fout y cu e no ta compatibel cu nan, pero esaki ta di 4 partido cu e politico ta afilia su mes na dje y supuestamente e ta papia di “Integridad” mientras cu ta un secreto publico cu e forma di otorga tereno comercial pa bende despues ta algo cu a cuminsa tempo e tabata minister di Infrastructura den gobernacion di MEP.
Den su carera el a yega di ocupa puestonan di Parlamentario, Presidente di Parlamento y Minister. Awo su soño di bira lider ta bira un realidad. Pero e pregunta ta: Cuanto confiansa votadonan por tin den un persona cu a cambia di diferente partido y ideologia asina tanto biaha. Awo como lider di partido MAS un partido chikito cu nunca no a logra nada, cu si e mester logra un asiento mes e lo mester sinta cu un di e grandinan manera MEP y AVP Pero ningun di e partidonan aki ta interesa di traha cu Marisol lopez Tromp debi di ta un politico individualista