Parlamentario di fraccion di MEP, Dangui Oduber, a expresa su profundo preocupacion y desacuerdo cu e manera cu Parlamento di Aruba a funciona durante e ultimo aña parlamentario. Segun e parlamentario, e periodo tras di lomba ta representa e peor rendimento den 40 aña di Status Aparte, caracterisa pa un falta di respet pa e proceso democratico, falta di transparencia di parti di Gobierno, y un ausencia di liderazgo cla pa dirigi e pais.
E representante di pueblo a enfatisa cu e sala di Parlamento ta e espacio pa excelencia caminda e voz, dolornan y preocupacionnan di e pueblo mester wordo scucha y debati. Sinembargo, e realidad actual ta mustra un panorama preocupante: seis di cada dies reunion publico pidi no ta wordo yama pa Presidente di Parlamento.
Ignorando e rol di control y e constitucion
Un di e puntonan di mas critico cu Oduber a señala ta e falta di contesta di parti di e gabinete di coalicion (formador pa Partido AVP y Futuro) riba e tareanan di control di Parlamento:
Preguntanan sin contesta: Gobierno a keda sin contesta casi 2,600 pregunta cu a wordo manda pa e diferenciando ministernan.
Falta di ‘Vragenuur’: For di e 15 peticionnan haci pa un ‘vragenuur’, niun solo un a wordo honra pa wordo yama.
E situacion aki ta duna un contraste sharp cu e programa di gobernacion di e partido di coalicion Futuro, den cual a stipula cu un Minister tin e obligacion pa contesta preguntanan di parlamentarionan den un termino di dos siman. Segun Oduber, tin preguntanan cu tin mas di un aña skirbi sin haya ningun tipo di contesta of oido, lo cual e ta clasifica como un falta di respet directo na e instituto di Parlamento, na su miembronan, y fundamentalmente na e pueblo cu a eligi nan.
E parlamentario a menciona cu e falta di debate y oido aki ta refleha directo den e problematica cu Aruba ta enfrentando diariamente den diferente sector:
Cuido di Salud: Problemanan serio na Hospital unda diariamente pashentnan ta wordo manda cas, salanan di operacion ta wordo cera, y tin un escasez preocupante di remedi y hulpmiddelen.
Costo di bida: Un explosion den e costo di bida cu a reduci e poder di compra di e ciudadano drasticamente.
Sector di Turismo y Serlimar: Inkietud y tension creciente den e sector di tour guides, tour operators, y e situacion critico di desperdicio via Serlimar.
“Esaki ta e resultado ora cu un Gobierno no ta duna oido na e voz di pueblo y ora cu Presidente di Parlamento ta ignora discusionnan y debatenan esencial. Nos a presenta un cantidad di mocion cu simplemente ta wordo ignora,” Oduber a declara.
Descurso di Gobernador ta refleha un ‘vacuum’ di liderazgo
Analisando e discurso di Gobernador recientemente presenta cual ta wordo compila pa Gobierno mes,Oduber a señala cu esaki a confirma e falta di vision y accion concreto pa resolve e problemanan real di e pais.
Añadi na esaki, e panorama politico ta wordo complica pa e retiro anuncia di e Prome Minister, kende aki algun siman ta baha como lider di partido y posteriormente como cabes di e gabinete. Segun Oduber, esaki ta crea un vacuum politico preocupante caminda ningun hende den e pais aki sa den cual direccion Aruba ta bayendo.
“Nos a yega rock bottom. E verslag cu nos a debati riba dje ayera den Parlamento ta e prueba di un Parlamento cu no ta funcionando debidamente pa culpa di su Presidente, y un Gobierno cu no tin un rumbo cla. E ta un motibo principal pakico mester bin un cambio hopi lihe pa restaura e respet y e funcionamento di nos democracia,” Oduber a conclui.