Local

Departamento di Impuesto ta preparando pa ehecuta e plan di Alivio Fiscal 2020 di gobierno


ORANJESTAD,Aruba

E plan aki lo ta vigente durante e lunanan di april te juni 2020

ORANJESTAD –Ayera minister di Finansa, Asuntonan Economico y Cultura, sra. mr. Xiomara Maduro, a presenta e plan di Alivio Fiscal 2020 na e comunidad di Aruba. E plan aki ta pa alivia e peso di impuesto den e momento di crisis aki cu e unico proposito di solidaridad y recuperacion pronto di e economía di Aruba.

Departamento di Impuesto como un di e departamentonan di gobierno di vital importancia pa mantene finansa publico na un nivel sostenibel, ta preparando pa ehecuta e plan menciona durante e lunanan di april te cu juni venidero.

Kico e plan di Alivio Fiscal ta encera? Den liña grandi, e plan di Alivio Fiscal ta encera cu ta:  Prolonga e termino legal di pago di e impuestonan mensual manera BBO/BAVP y BAZV, toeristenheffing, speelvergunningsrecht pa empresanan cu ta realisa actividadnan relata na turismo.  Absolve e dunado di trabou, e empresario cu ta realisa actividadnan relata na turismo, di paga su contribucion di AOV/AWW di luna di april, mei y juni 2020.  Prolonga e termino legal pa entrega declaracion y pa haci pago di winstbelasting 2019 cu excepcion di e institutonan financiero.  Pospone e pago cu 3 luna riba acuerdo di pago vigente.  Abstene di cobra boet pa incumplimento, ora cu no cumpli cu impuesto debidamente.  Suspende interes riba debe di impuesto pendiente.  Aplica areglo di pago flexibel, na unda ta aplica un termino di pago mas largo.  Sanea debe di impuesto ora cu paga e suma den un solo biaha.  Suavisa maneho encuanto reduccion di tarifa riba pago di dividendo.  Duna esnan cu antes no a cumpli cu impuesto, un chens pa cumpli ainda sin cu ta impone un boet pa delito fiscal.  Aplasa e proceso di cobramento cu forsa di ley cu 3 luna.  Aplasa e controlnan di buki cu 3 luna.  Mehora e servicio pa medio di declaracion online y pago.  Mantene transparencia den dunamento di informacion.

Mester remarca cu e puntonan menciona ta mara na cierto condicionnan. Den e dianan cu ta sigui, Departamento di Impuesto lo elabora mas amplio riba cada un di e puntonan menciona. Departamento di Impuesto lo publica e plan di Alivio Fiscal riba e website www.impuesto.aw of e pagina di Facebook ‘Departamento di Impuesto’.

Sigui tur noticia Na cualkier momento por tin noticianan importante y pa tur noticia oficial, Departamento di Impuesto ta conseha un y tur pa consulta su website www.impuesto.aw y/of e pagina di Facebook: Departamento di Impuesto. Tambe ta pidi pa download e app ‘BO impuesto’ pa ricibi noticia.

Gerencia di Departamento di Impuesto 28 di maart 2020
IMPORTANTE

Related posts

Parlamentario Mervin Wyatt Ras : E Comunicado di director di Arubahuis no ta e forma di anda cu nos studiantenan

EA News Author

HAVA ta preocupa si e trabou di dokter di cas ta stop di existi

EA News Author

PRONOSTICO DI TEMPO VALIDO TE DIAMARS 17 DI MAART 2020, 18:00 ORA.

EA News Author

Leave a Comment