Wardakosta di Karibe Hulandes huntu ku su partnernan den kadena hudisial ta organisá un Dia Habrí spektakular pa e komunidat di Boneiru. E dia aki ta destiná pa informá e komunidat i hóbennan tokante e trabou di e partnernan di seguridat marítimo. E evento ta sirbi tambe komo un oportunidat pa fortalesé e laso ku e partnernan den e kadena hudisial na Boneiru.
E Dia Habrí lo tuma lugá 24 di mei awor na Noordpier i ta primintí di bira un dia interesante ku aktividatnan interaktivo i edukativo pa un i tur. E cutter Jaguar di Wardakosta lo ta presente huntu ku botonan di patruya di e ‘Multidisciplinaire Maritieme Hub Bonaire’ (MMHB) i otro ekiponan. Bishitantenan ta haña un bista úniko tras di kortina di e trabou di Wardakosta, tambe por hasi un rekorido riba e cutter Jaguar i mira hopi demostrashon di e operashonnan konhunto di e partnernan di serka. E helikòpter di Wardakosta lo sòru pa un ‘fly-by’ espektakular. Hóbennan ku ta interesá den un karera serka Wardakosta por haña informashon tokante e Estudio Básiko di Wardakosta. E partnernan den kadena hudisial ku ta partisipá na e Dia Habrí ta; Wardakosta, Kuerpo Polisial Hulanda Karibense, Duana, Koninklijke Marechaussee, CITRO, STINAPA, Havenmeester i Entidat Públiko Boneiru. E orario di e Dia Habrí ta entre 10 ‘or di mainta pa 2 ‘or di merdia i e entrada ta grátis.
Nos ta invitá henter komunidat di Boneiru kordialmente pa asistí na e dia spesial akí. E Dia Habrí ta un oportunidat úniko pa topa partnernan di e kadena hudisial na un solo lugá, pa mira e vários unidatnan di aserka i pa eksperensia demostrashonnan interesante di e trabounan riba laman. No pèrdè!