Ku orguyo Tourism Corporation Bonaire (TCB) ta lansa su kampaña di mas nobo: ‘Rediscover Boneiru: 25 manera nobo pa eksperensiá nos isla’. Ku e kampaña akí TCB ta invitá bishitantenan pa bin Boneiru bèk i deskubrí e ofertanan nobo di nos isla, ku ta kombiná aventura, kultura, relahamentu i sostenibilidat ku otro. Sea ku nan ta en buska di aventura, delisianan kulinario òf ‘wellness’, Boneiru tin algu nobo pa tur hende.
E kampaña akí ta enfoká riba merkadonan norteamerikano, oropeo i regional i riba nos komunidat lokal i ta destaká 25 eksperensia nobo ku ta mustra Boneiru su paisahe ku ta evolushonando. Ku un variedat amplio di aktividat, for di rekoridonan aventurero i inisiativanan ekológiko te hòtspòtnan kulinario i relahamentu di luho, no tin un momentu mas mihó pa redeskubrí e enkanto úniko di nos isla. Bishitantenan por eksplorá e eksperensianan akí ku ofertanan eksklusivo di partnernan lokal.
‘Boneiru ta sigui krese i evolushoná i e ta ofresé un meskla vibrante i relahamentu i aventura’, segun Elesiër Angel, direktor di TCB. ‘Ku e kampaña akí nos ke enkurashá bishitantenan ku a yega di bishitá Boneiru kaba, pa bini bèk i deskubrí tur e ofertanan nobo di nos isla. Sea ku bo ta biaha bo so, komo pareha òf ku henter famia, nos eksperensianan nobo ta sòru pa un vakansi úniko na un isla úniko.’
E kampaña ta presentá e siguiente kategorianan di eksperensia: transporte, aventura i eksplorashon, relahamentu i tempu liber, wellness i self-care, inisiativanan ekológiko i sostenibel i desaroyonan nobo.
E kategorianan akí ta ofresé eksperensia nobo eksitante ku a keda desiñá pa enrikesé e tempu ku e bishitantenan ta pasa na nos isla, di manera ku tin algu pa deseo di tur hende.
Bishitantenan ku ke redeskubrí Boneiru i probechá di e eksperensianan i ofertanan nobo, por bishitá e ‘landing page’ spesial riba https://bonaireisland.com/rediscover-bonaire/ pa mas informashon i pa reservá nan vakansi pa aña 2025.
Si bo tin pregunta òf bo ta deseá informashon adishonal, no keda sin tuma kontakto ku nos via marketing@bonaireisland.com.