Politica

E Trabou Boluntario Ta Esencial Pa Nos Comunidad Y Mester Wordo Reconoci


ORANJESTAD,Aruba

Prome Minister Evelyn Wever-Croes:
Mas di 90 boluntario a ricibi e “Volunteer of the Year Award 2019”

Siman pasa Prome Minister Evelyn Wever-Croes a reemplasa Minister Glenbert Croes na e di tres edicion di e VOLUNTEER OF THE YEAR AWARD (VOTY) organisa pa CEDE Aruba. 

VOTY Award ta un proyecto hopi bunita den cual CEDE Aruba ta duna organisacionnan den nos comunidad e oportunidad pa reconoce un boluntario cu a duna un aporte special den e aña anterior.

Trabou bolunario ta algo impagabel. Ta danki na nos boluntarionan, tur nos organisacionnan social, clubnan di deporte, scolnan, centronan di cuido y organisacionnan pa hoben, por funciona. P’esey Gobierno di Aruba tambe ta apoya e VOTY Award. E mensahe cu Gobierno kier duna ta cu trabou boluntario ta esencial y cu e mester wordo reconoci.

E anochi di VOTY Award, mas di 90 boluntario a ricibi reconocemento como aprecio pa tur loke nan ta haci den y pa nos comunidad sea den organisacionnan social, deportivo of educacional.

“Normalmente nos ta bisa, pa e man drechi no mester sa kico e man robes ta haci. Wel awe mi ta hopi contento cu e diferente organisacionnan a scoge boluntarionan, pasobra boso ta asina bon den sconde pa e man drechi locual e man robes ta haci, cu ta dificil pa distingui. Pasobra awe ta momento pa para keto na e trabounan grandi cu boso cada un ta eherce.

Na tur e boluntarionan nomina, danki. Bo ta sacrifica bo tempo, di bo famia, di bo trabou; bo ta haci gastonan di bo pa yuda otro; bo ta haci extra esfuerso pa otronan, talves mas cu pa bo propio yiu tin biaha. Pa esaki awe mi ta gradici bo di curason. Danki pa tur bo labor, pa bo dedicacion, pa bo curason bunita cu bo tin”, tawata palabranan di gratitud cu Prome Minister Evelyn Wever-Croes a dirigi na e boluntarionan cu a ricibi e VOTY Award.

Ta bon pa remarca cu e premionan cu a wordo entrega a wordo traha door di material recicla, entre otro plastic cu a wordo colecta na nos beachnan y rond di Aruba. Asina e proyecto tambe tin un meta sostenibel y ta bon pa nos medio ambiente.


Related posts

Minister Andin Bikker a entrega ekiponan nobo na Cuerpo di Bombero

EA News Author

Prome Minister Evelyn Wever-Croes: Mediaraad lo ta un Fundacion independiente pa duna Conseho y Opinion

EA News Author

Parlamentario Endy Croes: Raad van Advies a confirma cu AVP a hisa gastonan di personal cu 81.3 miyon florin anto awe kier culpa un gobierno decente

EA News Author

Leave a Comment