Tin un diferencia grandi entre un minister cu no ta di acuerdo cu Parlamento y un minister cu simplemente no ta contesta ni respeta Parlamento su funcion. Segun lider di fraccion di PPA, Eduard Pieters, Aruba ta bayendo den un direccion hopi peligroso den e gobernacion aki.
Durante e conferencia di prensa tocante e cambionan den enseñansa basico publica riba un website di FUTURO, Pieters a expresa su preocupacion principal ya no ta solamente e contenido di e reforma. Pa Pieters, e problema ta hopi mas profundo: Gobierno ta perde e costumber di duna cuenta na Parlamento.
Educacion ta solamente un ehempel mas
Pieters a enfatisa cu PPA no ta contra e reforma den scolnan publico pa crea un sistema educativo mas inclusivo. Al contrario, e partido ta sostene e cambionan cu realmente lo mehora e enseñansa di Aruba. Pero, segun Pieters, ningun reforma por logra exito si Gobierno no ta prepara e maestro y no ta implementa e fundeshi educativo cu mester pone e cambio den practica. Sinembargo, e preocupacion di PPA riba varios aspecto di enseñansa no a haya e espacio ni oido, mientras cu un cantidad di maestro a bati na porta desde cu e ta minister y sigur despues di e ultimo anuncio.
“Nos no ta busca show. Nos ta busca dialogo.”
Segun Pieters, fraccion di PPA a busca repetidamente dialogo cu Ministerio di Enseñansa. No solamente den preguntanan cu ta haci por escrito, sino tambe den e reunionnan di comision, caminda no tin camara, no tin prensa y caminda e ambiente ta hopi mas trankil pa hiba un discusion constructivo cu e minister en cuestion y aporta na mehora e calidad di enseñansa.
Pero, segun e parlamentario, ni den e circunstancianan aki, Gobierno a mustra suficiente disposicion pa contesta e preguntanan y e preocupacionnan cu Parlamento a presenta. Pa Pieters, esaki ta mustra cu e problema no ta politico. E problema ta falta di disponibilidad y responsabilidad constitucional pa duna cuenta.
Pieters a recorda cu den un Estado di Derecho, e ministernan no ta haciendo un fabor na Parlamento, ora nan mester bin duna cuenta na Parlamento. Nan mester cumpli cu un deber constitucional. “Den nos Constitucion, minister ta responsabel na Parlamento. No Parlamento na minister.”
Segun Pieters, Parlamento no por bira un institucion cu mester sigui insisti pa haya contesta, mientras e ministernan ta sigui pospone e reunionnan of evita e dialogo cu e representantenan legal di pueblo.
Un presidente di Parlamento mester proteha e institucion
Pieters tambe a apela na Presidente di Parlamento pa eherce e autoridad cu e cargo ta brinda.
Segun Pieters, no ta trata di confronta e ministernan, sino di proteha e dignidad di Parlamento. En bes di sigui pospone e reunionnan, el a propone un sistema mas cla: presenta diferente fecha disponibel y pidi minister scoge for di un di nan.
“Un presidente di Parlamento no mester ta mendiga pa un minister bin. E mester exigi pa Gobierno cumpli cu su obligacion constitucional.”
Pa Pieters, respet pa Parlamento no ta un asunto protocolario. Ta un principio democratico.
Un gobierno cu no ta scucha Parlamento, finalmente no ta scucha pueblo
Pa lider di fraccion di PPA, henter e proceso aki ta bay hopi mas leu cu un cambio den e sistema educativo.
Ta un reflexion con Gobierno ta mira Parlamento.
Si e ministernan no ta dispuesto pa dialoga, no ta contesta e preguntanan y no ta considera critica constructivo, e capacidad di Parlamento pa controla Gobierno ta debilitando. Y ora control democratico debilita, ta e pueblo ta perde. Un gobierno cu no ta dispuesto pa scucha Parlamento ta cuminsa perde su compas. Paso Parlamento no ta representa un partido politico. Parlamento ta representa pueblo di Aruba.