“Nos no por laga beroepsonderwijs bira e yiu lubida di Aruba”
Durante un bishita di trabou na EPB Hato, parlamentario Eduard Pieters di fraccion di PPA a
laga un mensahe cla y contundente: Aruba no por sigui papia di desaroyo economico y
crecemento sostenibel, mientras e base practico di nos enseñansa ta laga atras.
Segun Pieters, e bishita no tabata solamente pa presencia e examen di Kok-opleiding, pero pa
mira cu su propio wowonan e realidad cu e docentenan y e studiantenan di EPB ta enfrenta tur
dia. “Ora bo cana den e scol y bo mira e condicionnan cu e docentenan ta traha aden, bo ta
compronde cu tin un problema hopi mas grandi cu djis mantencion aki aya,” el a declara.
E docentenan ta haci milager cu poco recurso
Pieters a destaca cu, a pesar di e condicionnan dificil, e scol ta sigui produci resultado danki na e
compromiso extraordinario di e docentenan. “Nos ta papia di hende cu ta traha cu amor,
determinacion y energia, mientras nan ta haci milager cu recurso limita,” el a bisa.
Pero segun PPA, e dedicacion di e maestronan no por sigui wordo uza manera excusa, pa
gobierno evita su responsabilidad. E edificio di EPB tin mas di 30 aña y segun Pieters, e
deterioracion ya a pasa punto di “patch” y solucion temporal. E daknan ta yen di buraco, e
infrastructura ta haci posibel cu e scol ta enfrenta gasto di coriente hopi halto.
“E momento pa reaccion y investigacion a pasa caba. Awor ta momento pa inverti seriamente,
prome cu algo grandi pasa y despues tur hende ta busca ken tin culpa,” Pieters a adverti.
Beroepsonderwijs no ta di dos categoria
Un di e criticanan mas fuerte di Pieters tabata riba loke e ta considera un abandono structural
di beroepsonderwijs na Aruba. Segun Pieters, gobierno ta sigui trata e sector manera
enseñansa general secundario, a pesar cu precisamente EPB y EPI ta forma gran parti di e
profesionalnan cu Aruba su economia turistico ta depende riba dje cu ta exigi mas inversion
compara cu un enseñansa secundario general manera un mavo of havo/vwo.
“Nos no por sigui wak beroepsonderwijs manera e yiu lubida di nos sistema educativo, mientras
Aruba ta grita pa chef, tecnico, operador, artisanonan y personal practico califica,” el a enfatisa.
Pieters tambe a pone enfasis riba e falta di movemento cu e ley di beroepsonderwijs, algo cu
PPA ta considera esencial pa modernisa e sistema y duna EPB y EPI e structura cu nan mester pa
funciona manera un beroepsonderwijs moderno.
Inverti den EPB ta inverti den futuro di Aruba
Durante su bishita, PPA a tuma nota tambe di e esfuerzonan interno cu direccion y e
docentenan ta haci pa genera entrada y sostene cierto renobacion. Pero pa Pieters ta hopi cla,
cu e tipo di inversion grandi cu EPB mester, no por cay riba scol of fundacion so.
“Si gobierno ta papia di surplus, e ora pueblo tin derecho di mira unda e prioridadnan ta. Y
enseñansa practico mester ta un di nan,” el a declara.
Segun Pieters, si e renobacion ta costa 7 of 8 miyon florin, Aruba mester mira esaki no manera
gasto, pero manera inversion den capital humano y den futuro sostenibel di pais.
E mensahe final di Pieters di fraccion di PPA tabata directo: Aruba no por sigui laga EPB lucha su
so. E scol ta yena cu potencial, cu e docentenan motiva y cu e hobennan cu kier progresa. Pero
sin inversion serio, e sistema lo sigui deteriora. “Nos ta na un punto, unda gobierno mester
scohe: sigui pone ‘band-aids’ riba problema, of finalmente haci e inversion cu futuro di Aruba
merece,” Pieters a conclui.
