Bonaire Human Rights Organization (BHRO) i James Finies, lider di Pueblo Progresivo Uni, orguyosamente ta anunsiá ku e bos di e pueblo Boneriano a yega te na e mas haltu di instansianan global konserni ku e tema di edukashon. BHRO a risibí kontesta formal di tanto Konseho di Derecho Humanos di e Nashonan Uni na Geneva komo di Ministerio Hulandés di Edukashon, Kultura i Siensia na Den Haag, tokante e keho urgente entregá dia 10 di yüni 2025. E keho aki, ku ta enfoká riba Derecho di Edukashon, a pone den klaro violashon kontinou di e derecho di e mucha Boneriano, partikularmente na e uniko skol sekundario : Scholengemeenschap Bonaire – Unit Liseo Boneriano.
E keho di Edukashon ku a wordu presentá na yüni ultimo ta komplementá ku e keho mas amplio riba e “Kaso di Boneiru”, ku representantenan di BHRO a entregá personalmente na e Komishon di Eliminashon di Diskriminashon Rasial di Nashonan Uni na Genève den òktober 2024, ku ya a resalta diskriminashon sistemátiko kontra e mucha Boneriano. E keho aktual riba Edukashon ta un resultado i seguimiento di un reunion personal ku delegashon di Boneiru a tene na abril 2025 ku e Special Rapporteur di Derecho Humano di Nashonan Uni na New York. E delegashon aki tabata konsisti di: Davika Bissessar, presidente di BHRO; James Finies, lider di Pueblo Progresivo Uni i Joseline Thielman ku Phenice Frans Piar di Muhernan Fuerte, ala feminino di Pueblo Progresivo Uni.
BHRO a solisitá formalmente pa Konseho di Derecho Humano rekonosé e keho bou di su mandato riba edukashon i pa evaluá si e sistema edukativo ta kumpi ku e normanan, standardnan internashonal di derecho humano. Mas aún pa interakshon ku gobierno di Hulanda pa duna splikashon I klaridat, hasi un revishon, i tuma medidanan urgente pa rektifiká e violashonnan deskribí. E apelashon ta inkluí un rekordatorio di e obligashon Hulandés bou di Artíkulo 73 di e Karta di e Nashonan Uni, ku ta eksigi ku poder administrativonan ta garantisá: “ku debido konsiderashon pa e kultura di e pueblo envolví, su desaroyo polítiko, ekonómiko, sosial i edukativo, su tratamentu hustu, i su protekshon kontra abuso.”
E keho ta denunsia: 1- diskriminashon sistemátiko den edukashon na Boneiru, inkluso supreshon di Papiamentu den skolnan—un violashon di Artíkulo 30 di Konvenshon di e Nashonan Uni riba Derecho di Mucha (UNCRC)— 2- tenshon I miedo konstante ku ta silensia bosnan di edukadónan pa plantea prekupashon. 3- Mayornan ta wordu ekskluí sistemátikamente for di desishonnan tokante edukashon di nan yiu, otro violashon di e derecho garantisá bou di UNCRC. 4- E frakasonan den sistema ta kontribuí na daño sosial ku ta eskala, ku desinterés den skol, violensia, i ta kousa stres sikológiko serio—ku konsekuensinan tragiko komo suisidio I homisidio.
BHRO ta reafirmá su rekomendashonnan prinsipál, awor ku respaldo internashonal di entidatnan di derecho humano: 1- Revishon di maneho lingüístiko pa rekonosé Papiamentu komo idioma prinsipal di instrukshon, komo ekspreshon esensial di identidat Boneriano; 2- instalá mekanismonan kontra diskriminashon institushonal; 3- proteha edukadónan ku ta defende derecho di studiante; 4- i restituí ,debolbe e poder riba edukashon na gobierno Boneriano, di akuerdo ku Artíkulo 73 di e Karta di Nashonan Uni, pa garantisá liderato lokal basa riba rais kultural den edukashon.
Ademàs, e esfuersonan I lucha internashonal di BHRO a resultá den un eksito signifikante. Komo reakshon na e yamada urgente pa akshon dor di Konseho di Derecho Humano di Nashonan Uni , ofisina di Minister Eppo Bruins i Ministerio Hulandés di Edukashon ta interaktua formalmente ku BHRO pa trata e problemátikanan sistemátiko den edukashon. Esaki ta un paso importante pa logra solushon konkreto, i ta refleha e rekonosimentu ku ta kresiéndo pa BHRO —na nivel nashonal i internashonal—di e urgensia pa proteha i respetá e derechonan edukativo i humano di e pueblo Boneriano.