No a tarda mucho, cu empleadonan na principalmente DIP, DOW y Serlimar a cuminza basha abow y ta denuncia e preshon y te hasta maltrato cu tabatata worde eherce riba e departamento for di banda di e bureau di ex minister di infrastructura Marisol Lopez Tromp. Empleadonan a mustra riba e hecho cu ta un falta di respet enorme tabata tin di algun asina yama coordinadornan di ex mandatario, cu a keda manda cas pa falta di confianza y sosten siman pasa.
Directornan di e diferente departamentonan tampoco lo ta kedando keto y ta bashando abow kon preshon tabata wordo poni pa entre otro bypass e reglanan y leynan cu a keda introduci, netamente pa frena y para e fiesta di tereno cu tabata tin bao di e
gobierno y minister anterior di AVP. Serlimar tampoco ta un excepcion. Aki tambe e personal y hasta esnan na cabez di e compania a cuminza divulga e metemento pisa di e bureau di e ex minister encarga cu Serlimar, unda hasta ta papia di boycotnan cu tabata tuma lugar, como tambe di previlegio y contractnan cu no tabata carga aprobacion di e hunta y of conocimento di Gabinete Wever Croes. Entre otro lo tabata tin un boycot pisa riba e projecto di insinerador, cu awo ta resulta di ta full cla pa drenta operacion for di mas cu 6 luna pasa caba, unda hasta esaki a pasa tur testnan necesario di DOW.
Terenonan huurgrond tabata e cou hunga di e bureau di e ex minister, unda terenonan di riba 20 y 30 mil meter cuadra tabata wordo gefix na esnan serca di e minister. Empleadonan na DIP ta splica con cierto momento a pone tur e maneho y reglanan vigente un banda, te na un punto cu a cuminza sinti e mesun modus operandi di tempo di ex minister Benny Sevinger, unda tur decicion tabata cai na e oficina di e minister, sin tuma consehonan di DIP na cuenta. Directornan tabata bao di un preshon enrome. E minister tabatatin su propio agenda. Hopi puyitonan a cuminza bolter y sali for di e macuto y no tin miedo di basha abow tur loke tabata pasando na e departamentonan cu tabata resorta bao di ex minister Marisol Lopez Tromp cu a wordo retira pa falta di confianza y sosten.
