KRALENDIJK, Bonaire
Entrante 1 di mart winshil i e glasnan di banda na e parti dilanti di vehíkulonan di motor mester kumpli ku e norma di 35% pa loke ta trata e kantidat di lus ku nan ta laga pasa. Dia 27 di febrüari Konseho Insular a bai di akuerdo ku e kambio aki di artíkulo 85, insiso 1 sup c, e di kuater punto di Lei di Tráfiko Boneiru 2019. E proposishon tabata pa laga e norma di 70% ku desde 1 di ougùstùs 2019 ta vigente, bai bèk di 70% pa 55%. Pero finalmente Konseho Insular a skohe pa baha e norma mas tantu ainda, te 35%. Esaki ta nifiká ku desde 1 di mart 2020 polis lo mester mantené lei a base di e 35% aki. Anteriormente polis a anunsiá ku outomobilistanan ta haña tempu durante henter luna di mart pa sòru ku nan glas di outo ta kumpli ku e norma. Anteriormente triángulo a stipulá sinku prioridat. Banda di kombatí korementu di outo despues di a bebe alkohòl, e obligashon pa bisti faha di siguridat, e obligashon pa bisti hèlm pa koredónan di skuter, motosaikel i ‘quad’, e prohibishon pa tene telefòn selular den man ora ta kondusí un vehíkulo i e obligashon pa laga mucha te 4 aña den un stul spesial pa mucha.
Gezaghebber a pidi polis pa investigá kua ta e konsekuensianan ku e norma di 35% ta bai tin pa polis mantené e obligashon di faha di siguridat, usa telefòn ‘handsfree’ i uso di stul spesial pa mucha. Mas pronto posibel polis lo duna klaridat tokante esaki.
Entidat Públiko Boneiru a organisá ku riba djasabra 29 di febrüari siudadanonan por laga tèst nan glas di outo for di 09.00 – 12.00 or riba e lugá di parker di Plasa Nolly Celestijn na Rincon. Riba djadumingu 1 di mart outomobilistanan por akudí for di 09.00 – 12.00 or riba lugá di parker di Stadion di Playa.
