A termina curso di capacitacion den cuadro di maneho deportivo
Despues di un total di 5 tayer y 1 “feedback” sesion cu a dura un total di 11 siman, e federacionnan miembro di Comite Olimpico Arubano (COA) a keda cu e tarea di prepara un plan strategico of un “framework” di un plan. Cu esaki ta drenta e parti final e di dos fase di e “Capacity Building Training” (CBT) cu a ser organisa door di e Direccion di Desaroyo di COA. Utilisando tur e conocemento di e prome y e di dos fase di CBT, lo prepara un plan cu bista riba desaroyo a plaso largo.
E plannan cu ta wordo entrega lo ser controla door di ambos e Direccion di Desaroyo di COA y e profesionalnan cu a presenta e diferente tayernan, pa asina duna “feedback”. E idea ta pa e federacionnan miembro haci uso di e plan cu nan a construi pa asina implementa esaki pa cuminsa traha riba e desaroyo cu nan a indica como importante y/of necesario dentro di nan federacion.
Finalmente, algun di e plannan cu lo ser entrega a door di e federacionnan miembro lo wordo presenta durante e siguiente asamblea general di COA cu lo tuma luga den luna di december proximo. COA ta desea tur federacion hopi exito cu e construction y presentacion final di nan plan strategico, cu sigur lo sirbi na bienestar di e desaroyo di deporte na Aruba. #TEAMARU
Press release: Comite Olimpico Arubano
