Frakshon MAN-PIN a tuma asiento den Parlamento di Kòrsou dia 11 mei ultimo despues di un elekshon liber i demokrátiko. Nos a pone komo meta di sirbi den parlamento i duna aporte na drecha, alsa i alivio pa pueblo. Den esaki e prome lunanan nos a bini ku diferente inisiativa kual ta kumpli ku e meta ku nos a pone pa siribi pueblo di Kòrsou.
AOV
Frakshon a entregá kambio di lei pa kambia e lei di 2013 pa indeksashon di AOV(penshun di behes) di kresementu ekonomiko real pa indeksá segun oumento di kosto di bida.
Frakshon a hasi pregunta na Minister SOAW riba indeksashon segun lei aktual dor ku tabata tin kresementu ekonomiko real na añanan 2021 te 2024. Nos pregunta na minister SOAW ta ki dia ta paga e indeksashon na e penshonadonan.
Onderstant
Frakshon a entrega lei pa indeksa onderstant segun oumento di kosto di bida. Esaki ta nifiká ku pa lei e kobradó di onderstant tin derechi riba indeksashon di onderstant sin ku esaki ta na e minister/politiko pa disidí.
OZB
Frakshon a entrega kambio di lei pa OZB kaminda ta baha e schakelnan di OZB ku pueblo ta paga, esaki ta un bahada den e belasting aki. Nos a risibi konseho di SER nos ta bezig ta analisá esaki pa hasi adaptashon nesesario. Nos enfoke i meta ta keda ku pueblo mester risibi alivio di pago di belasting haltu di OZB.
Ambulans
Nos frakshon a hasi pregunta riba situashon di ambulansnan nobo kual tin hopi diskushon i mal kontentu bou di trahadonan riba esaki.
Minister a pidi un reunion di komishon sentral. Nos a hasi pregunta, Minister a pidi 2 siman pa kontesta.
Kas di Kòrsou
Nos frakshon a pidi Minister Presidente pa laga hasi investigashon riba tur e akusashonnan ku ta bin dilanti riba Kas di Kòrsou riba entre otro intimidashon i rumornan riba gastunan di transporte i hür. Pa nos Minister Presidente mester klarifiká i trese trankilidat na Kas di Kòrsou.
Refineria/RdK-2Bays
Frakshon a manda karta pa Minister Presidente riba pèrdida di kupo di trabou riba tereno di refineria i sutashon finansiero di RdK/2Bays. Riba e mesun tema nos a hasi.
petishon pa un reunion ku gerensia RdK/2Bays riba e situashon entre RdK, Global Oil i Oryx/VIGOR. Kual a tuma lugá di 4 yüli.
Situashon GAZA
Komo Frakshon nos a manda un karta pa Minister Presidente pa Kòrsou posishoná den Rijksministerraad pa Reino para kontra e genosidio ku ta tumando lugá na Gaza kaminda mucha i hende inosente no por yega na kuminda, awa dor di e situashon tenso entre Israel i Gaza.
Maneho Finansiero
Frakshon a manda un karta pa tur Minister riba kumplimentu ku e lei di subisidio.
Karta a bai pa minister di finansa riba kumplimentu ku lei finanserio pa loke ta relato di aña 2024 riba maneho finansiero.
Violensia i seguridat den nos pais
Frakshon a manda un karta riba situashon di seguridat. Hopi arma ta sirkulá, ladronisia den kas ku a lanta kabes. Den kua nos frakshon a pidi Gobièrnu pa tuma akshon pa atende ku e oumento di ladronisia i krimen.
Den e kaso aki frakshon a reuní ku un di klupnan di tiru riba e situashon di armanan illegal den nos pais.
Arbeidsregeling 2000
Komo frakshon nos a kuminsa ku nos ronda di bishita di gremionan den nos komunidat kaminda nos a hasi bishita na SSK kual ta un di e sentral sindikalnan na Kòrsou.
Resientemente SSK a entrega un proposishon di kambio den Arbeidsregeling 2000 na Parlamento kaminda e lei aki lo konta pa e trahadó den sektor di aviashon i haf. Komo frakshon nos a wak e proposishon, a hasi algun adaptashon, reuní ku SSK i entrega e lei na Parlamento, awor aki nos ta warda e konsehonan di SER i RvA pa asina e lei por sigui kana su kaminda pa yega na tratamentu den Parlamento.
Esaki ta otro deskriminashon den nos lei laboral ku nos ta kita.
Vaderschapverlof
Frakshon a bin ku e inisiativa di lei pa introdusí Vaderschap verlof pa tata na momento ku su yu nase. E proposishon ta pa 5 dia di trabou. Nos a risibi konseho di SER ku ta positivo pa e lei aki i tin adaptashon ku SER ta propone. 1 di e proposishonnan ku nos Frakshon lo hasi kambio ta ku e 5 dia lo bira 10 dia manera SER ta propone den su konseho. Nos ta finalisando e adaptashonnan pa asina e lei sigui kana su kaminda pa yega parlamento.
Penshun General
Desèmber 2024 e lei di penshun general a pasa parlamento den su totalidat di voto. Nos frakshon ta pidi pa e lei aki keda publiká i si mester hasi kambionan lo trese nota di kambio pa esaki. Den e rapòrt di IMF Article IV 2025 riba Kòrsou ta mustra e nesesidat pa introdusí un penshun general(2de pijle pensioen) pa atende pa futuro e problematika di entrada di nos hendenen 65+
Jeugdminimumloon
3 di yüli ultimo Parlamento a bai di akuerdo ku e kambio di lei di sueldo minimo pa hoben kaminda nos ta kita e deskriminashon pa e hoben entre 18, 19 i 20 aña. Ku e kambio di e lei aki hoben di 18 aña lo bai gana 500 florin mas na loke e lei ta aktual.
Nos yamada ta bai na Gobièrnu pa mas lihe posibel hasi e kambio di lei aki kaminda ta kita e deskriminashon pa un grupo di hoben di 18, 19 i 20 aña.