Ministernan cu ta evita di contesta preguntanan ta boycotia nan mes gobierno mas cu cualkier oposicion
For di februari 2025, fraccion di MEP como partido di oposicion a haci mas cu 770 pregunta na gobierno. Solamente 73 di e preguntanan aki a wordo contesta. Esaki ta un violacion di nos Constitucion (articulo III.17) y tambe di e Reglamento di Ordo di e Parlamento (articulo 59). Ademas e ta contra e compromisonan cu AVP-Futuro a tuma den nan acuerdo di gobernacion. Partido Futuro mes a priminti den su programa di campaña cu tur pregunta lo wordo contesta dentro di dos siman.
Sinembargo, e minister di Finanzas recientemente a declara publicamente cu oposicion ta “stroba gobernacion” pa motibo cu lo ta haci demasiado pregunta. Esaki ta un declaracion sumamente preocupante. Ta duna e impresion cu e minister no ta compronde cu e derecho pa haci pregunta y pa tene control ta un parti esencial di nos democracia parlamentario. Control politico no ta suppose di ta un molester; ta un obligacion segun nos constitucion.
Ta AVP y Futuro mes ta stroba nan propio gobierno. Crisis tras di crisis, escandalo tras di escandalo. Y ora cu oposicion cumpli su rol democratico pa pidi claridad, e gobierno ta purba stroba esaki como si fuera cu ta oposicion ta un problema. Pero e obstaculo berdadero pa goberna ta e falta di transparencia, e falta di respuesta, y e falta di cumplimiento di nan propio promesanan.
No ta oposicion ta boycotia gobierno. Ta e gobierno di AVP-Futuro mes ta boycotia nan mes, door di viola nan obligacion constitucional y kibra nan compromiso firma den e acuerdo di gobernacion. Pesey mi ta hasi un yamada urgente na e Minister President di pais Aruba y su coleganan minister: tuma e control di Parlamento na serio, y duna contesta. Mustra respet pa e fundeshi democratico. Esaki ta un deber pa cu e pueblo Arubano.