Na ocasion di e 80 aniversario di Aruba Trade & Industry Association (ATIA), Parlamentario Jennifer Arends-Reyes ta felicita e organisacion pa su consistencia, liderato y contribucion valioso na desaroyo economico y comercial di nos pais.
“For 80 aña, ATIA a sirbi como un pilar fundamental den nos economia, un plataforma cu ta uni sector priva y duna nan e bo bos necesario pa influencia politica y decisionnan clave,” Arends-Reyes a declara. “Un organisacion no ta existi pa tanto tempo si e no tin balor real y un rol sostenibel den un comunidad.”
ATIA a cuminsa su caminda na 1944 y for di e momento ey ta crece hunto cu Aruba, adaptando su rol segun e reto y necesidadnan di cada epoca. Su input den tema manera reforma legal, stabilidad laboral, y desaroyo empresarial a duna forma na hopi decision di impacto pa sector comercial. “Tur gobierno a haya balor den e dialogo cu ATIA. Nan bos ta representa e motor economico di Aruba,” segun Arends-Reyes.
Di manera special, e parlamentario a resalta e rol cu ATIA a tene den mantene un balansa riba mercado laboral. “Den momento di reto, manera pandemia of presion di inflacion, ATIA a sigui traha pa busca solucion sostenibel. E dialogo cu nan ta lanta entre empleadonan y dunado di trabou ta esencial pa stabilidad,” e ta indica.
E anochi di celebracion cu ATIA a organisa pa su miembro y colaboradonan no tabata solamente pa marca un fecha historico, pero tambe pa reflexiona riba loke a logra hunto. “Un anochi cu ta honra esunnan cu a contribui y cu ta duna motivacion pa wak futuro cu pasion y determinacion,” Arends-Reyes a agrega.
Como lider di fraccion di AVP den parlamento, a asisti na e conmemoracion di e aniversario y ta reafirma su compromiso pa sigui traha den colaboracion cu institucionnan manera ATIA pa promove un economia fuerte, diversifica y sosteni.
“Mi ta sigur cu e proximo 80 aña lo trece mas innovacion, crecemento y desaroyo. ATIA ta yega e milestone aki cu orguyo y nos pueblo ta gradici tur trabou cu ta haci pa avansa Aruba,” Arends-Reyes a conclui.