Despues di 20 aña, Señor Ady Thijsen ta retira di politica
Diaranson ultimo, Kabinet di Aruba na Den Haag, Aruba Huis, a tuma despedida di Minister Plenipotenciario señor Ady Thijsen. Señor Thijsen a bay Hulanda na 2021 como representante di Aruba na Union Europeo y na 2022 a asumi e encargo di Minister Plenipotenciario. Cu e puesto di GevMin, señor Thijsen tabata tin na su encargo 2 puesto cu ta bin cu hopi responsabilidad, y el a acepta esaki cobrando un salario.
Parlamentario Evelyn Wever-Croes tabata presente na e ceremonia di despedida y a expresa su gratitud na señor Thijsen pa tur loke el a haci den e ultimo añanan. El a indica cu e mas bunita tabata di mira e impresion y e impacto grandi cu señor Thijsen a laga atras na Den Haag. Presente na e ceremonia aki tabata embahadornan mirando cu e ultimo añanan el a traha hopi riba e relacion di Aruba cu otro paisnan. Tabata tin presente hopi miembro di Parlamento y Gobierno hulandes paso cu nan tambe el a traha hopi di serca. Tambe a bin despedi di señor Thijsen varios Arubianonan cu ta biba na Hulanda, sin lubida e studiantenan pa kende el a pone tur su curason den yuda cada un di nan.
“Den nomber di henter pueblo di Aruba, mi kier a gradici señor Ady Thijsen pa e trabou grandi cu el a haci pa Aruba na Hulanda. Mi ta hopi contento cu mi ta na Hulanda pa motibonan personal y por a asisti na e recepcion aki, y mira pa mi mes e impacto cu el a laga atras. Aworaki el ta tuma su despedida tambe di política y e ta bay Aruba bek pa asina goza di su añanan di pensioen. Danki Ady pa tur cos, y sa cu nos ta sumamente orguyoso di e trabou cu bo a desplega durante tur e añanan aki pa pais Aruba” Parlamentario Wever-Croes a expresa.
Señor Thijsen na su turno tambe a expresa cu e dia aki ta uno hopi special p’e, na unda cu e ta pone un punto tras di su 20 aña den política. El a indica cu e ta sumamente agradeci pa e oportunidad cu e tabata tin di traha pa pais Aruba y ta contento di mira tur esnan cu tabata presente, manera e ex ministernan, ex prome minister Evelyn Wever-Croes, representante di Eerste Kamer etc, duna balor na e trabou cu el a bin ta haciendo pa Aruba. Importante ta pa Aruba ta visibel y esaki a wordo mustra cu presencia di tur esnan presente. E fundeshi entre Hulanda y Aruba ta uno fuerte y awor ta keda na e Gobierno nobo di Aruba pa sigui traha riba dj’e. Señor Thijsen ta gradici tur esnan cu di un of otro manera a yud’e durante su 20 añanan den politica pero specialmente den e ultimo 3 añanan aki cu tabata hopi importante pa su persona.
