Djaluna Stichting Monumentenzorg Curaçao a pidi asistensia di brantwer pa sera parti di hanchi Gasthuisstraat, Bajonetsteeg (entre Gasthuisstraat ku Spaansesteeg) i parti final di Spaansesteeg den area di Rif na Otrobanda. A skohe pa e medida preventivo aki pasombra e fachada monumental pega ku e hanchinan, ku tabata den mal kondishon kaba, a empeora pa motibu di e gran kantidat di awa seru di ultimo dianan.
E fundashon a hala e restourashon di emergencia dilanti – ku ya kaba tabata planea – pa esaki por kuminsá na fin di yüli. Djamars ta pone stengel rondo di e edifisio i hèki di konstrukshon den Gasthuisstraat.
E edifisio ta forma parti di un proyekto di restaurashon ambisioso, ku tambe ta inklui dos otro monumento pega kune den mesun kaya, entre otro e markante ‘Villa Malakoff’.
Stichting Monumentenzorg Curaçao ta pidi diskulpa pa kualkier inkumbinensia temporal i ta avisa tur hende pa no tuma ningun riesgo inesesario i pa evita e area será.
