Cuerpo Policial Aruba ta bolbe enfatisa e importancia pa entrega e arma di candela boluntariamente.
Diadomingo 29 di maart 2026, Polis a haci un detencion relaciona cu posecion di arma di candela.
Durante un control den e vehiculo di e sospechoso, agentenan policial a haya un tas cu tabata contene un pistool hunto cu municion. Esaki ta subraya un bez mas e peliger cu presencia di arma di candela ilegal ta representa den nos comunidad.
E persona en cuestion a wordo deteni mesora pa violacion di e Vuurwapenverordening. Ta trata di e homber naci na Aruba T.S.C. Cuerpo Policial di Aruba y Ministerio Publico a traha cu rapidez riba e caso y diamars 7 di april 2026 T.S.C. a wordo hiba dilanti Corte den un asina yama “snelrecht zitting”. Huez a conden’e pa un castigo di prison di 18 luna, di cual 6 luna ta condicional.
Ademas Huez a pon’e bao supervision di Reclassering como un condicion adicional.
Cuerpo Policial conhuntamente cu Ministerio Publico kier enfatisa cu e accion di entrega bo arma di candela ilegal ainda ta andando. Meta di e campaña aki ta pa duna tur persona e oportunidad di deshaci di nan arma di candela ilegal sin cu nan wordo persigui penalmente pa e posesion di esaki.
Un recordatorio cu accion di entrega e arma di candela ilegal ta te cu dia 24 April 2026 y bo por deposite den e baki blauw na San Nicolas y bo ta keda completamente anonimo.
Autoridad ta manda un aviso cla y raspa cu e controlnan lo sigui intensifica den tur bario. Haci uzo di e oportunidad aki awor: no warda te ora ta laat. Entreg’e of nos mes lo bin busc’e!.