Diferente konseho pa sa kon aktua durante un kalamidat ta para riba e wèpsait di Entidat Públiko Boneiru www.bonairegov.com. Awor ku temporada di orkan a kuminsá ta importante pa sa kiko hasi durante un orkan, inundashon òf
warwarú. Fenómenonan di naturalesa ku por okurí den lunanan binidero. Por haña e konsehonan ora primi e kònòpi ‘kombatimentu di desaster’ riba e wèpsait.
E temporada di orkan ta di 1 di yüni te ku 30 di novèmber. Awor ku e temporada di orkan a kuminsá, Entidat Públiko Boneiru ta hasi un yamada na un i tur pa prepará bon, pa kualke posibel kalamidat. Prepará pa bo por yuda bo mes, ta hopi importante. Durante un kalamidat ta importante pa por yuda bo mes. Servisionan ku ta duna ayudo no por ta presente tur kaminda pareu.
Riba e wèpsait por haña tambe un link pa download e aplikashon Desasterprep. Riba e app akí, ku ta funshoná riba tur selular, tin konseho i medidanan di prekoushon. Riba www.bonairegov.com tin diferente manera pa download e aplikashon pa diferente marka di selular.
Un foyeto di Entidat Públiko Boneiru ku informashon tokante temporada di orkan na kuater idioma, tambe por download riba e wèpsait www.bonairegov.com. Un tempu pasa ya e distribuí e foyeto aki kas pa kas.
Ku e páginanan speshal riba e wèpsait www.bonairegov.com ku yen konseho, e aplikashon Disasterprep i e foyeto ku informashon na diferente idioma, Entidat Públiko Boneiru ta spera ku tur hende ta informá nan mes na tempu. Palabrá for di aworakí ku miembronan di famia i bisiña kiko hasi ya kaba ta un paso den bon direkshon.