Kustwacht a cuminsa selecta hobennan di Aruba pa asina pasa nan test nan pa por haci e estudio di Kustwacht. Esaki no ta un trayectorio facil , pero e no ta imposibel. Na marinier Kazerne e hobennan cu a keda selecta a haci diferente testnan entre otro deporte pa asina mira nan habilidad, test medico pa nan salud, test psicologico y tambe na final lo mester papia cu nan mayornan mirando cu nan ta hobennan relativamente hoben cu ta entre 18 pa 25 aña. Esaki ta pone cu nan mayornan tambe lo ta forma parti di nan seleccion y e proceso di nan estudio.
E trabao di Kustwacht tin su retonan cu ne fisicamente y mentalmente mirando cu nan ta riba lama y boto oranan largo. Tambe durante di e trabao tin cierto accionnan cu mester keda tuma cu bo mester ta fit pa por atende cu e accionnan aki cu ta presenta riba lama den dia y den oranan di anochi.
Pa e motibo aki mes e hobennan cu ta desea di drenta Kustwacht mester ta fit. Na marinier Kazerne na Savaneta a tuma luga e pre seleccion unda cu dos dia lo tin dos diferente grupo cu ta bay haci nan test y abase di e test ta bay sigui seleccion. Na final di tur cos lo mester resta 7 hoben cu lo bay uni cu 7 hoben di Corsou y St Maarten cu ta bira un total di 21 hoben di Caribe cu ta bay haya e estudio pa bira agente di Kustwacht.
E procedura a cuminsa for di januari ultimo y e la cera caba. Pero e hobennan no mester perde speransa mirando cu pa 2022 tambe lo mester bay selecta mas hoben , pesey ta importante pa esunnan cu ta interesa por aplica den luna di april 2022. E hobennan cu solicita lo selecciona nan y mira cuanto di nan ta cay na remarca pa asina nan cuminsa cu e procedura pa haci diferente testnan necesario pa asina mira si nan ta pasa tur test pa nan por cuminsa cu e estudio di Kustwacht cu lo keda haci na Corsou pa un temporada y despues nan lo bolbe bek Aruba unda cu nan lo core un stage.
Despues cu nan caba nan estudio nan lo bay Corsou y St Maarten pa nan haya experiencia pa traha den team y siña di otro unda cu nan lo topa esunnan cu ya caba tin experiencia y tin varios aña caba den nan funcion y na momento cu nan haya e suficiente experiencia nan lo bolbe Aruba bek pa asina nan lo por eherce nan trabao dignamente entre e islanan.
