Cu gran tristesa y profundo dolor den nos curason, nos ta tuma nota cu nos querido y legendario musico Robert JeanD’or a bay laga nos recientemente.
Robert JeanD’or tabata un di e pilarnan cultural mas grandi di Aruba, un homber cu su talento, humildad y dedicacion pa musica a trece inspiracion na generacionnan riba generacion. Den su trayectoria impresionante di mas cu 55 aña, Robert a desaroya un carera musical cu no solamente a pone su nomber ariba mapa cultural di Aruba, pero tambe internacionalmente a expone nos isla como centro di atencion.
𝐔𝐧 𝐁𝐢𝐝𝐚 𝐝𝐞𝐧 𝐌𝐮𝐬𝐢𝐜𝐚
Desde su cuminsamento cu ritmonan di baile na Radio Kelkboom, su participacion den bandanan conoci manera Blancas Palomitas, Los Juveniles, Los Lirios y The Boys, La Nueva Fuerza te su trabounan como musico profesional hunto cu grandinan internacional manera Johnny Ventura, Celia Cruz, Oscar D’León, Larry Harlow, Bobby Valentín, Wilfrido Vargas, Frankie Ruiz y, Juan Luis Guerra y hopi otro, Robert semper a briya cu un nivel di excelencia.
Su musica a resona den baile-, show-, festival- y grabacionnan internacional, incluyendo presentacionnan na Madison Square Garden na New York, Colombia, Puerto Rico, Republica Dominicana, Miami y hopi otro escenario di renombre. El a graba disconan historiconan cu; Hijos del Rey, El Gran Combo y Internacionalmente su participacion cu Johnny Ventura riba e album iconico El Caballo Mayor, como tambe a graba cu Juan Luis Guerra. Despues cu ela regresa Aruba ela lanta su banda Robert y su Solo Banda Show cu tin mas di 30 aña di existencia y semper a keda activo.
𝐑𝐞𝐜𝐨𝐧𝐨𝐜𝐞𝐦𝐞𝐧𝐭𝐨 𝐲 𝐇𝐨𝐦𝐞𝐧𝐚𝐡𝐞𝐧𝐚𝐧
Durante su carera extenso Robert JeanD’or a ricibí hopi homenahe y premiacion:
𝑅𝑒𝑦 𝑑𝑖 𝑇𝑢𝑚𝑏𝑎 (𝐴𝑟𝑢𝑏𝑎) – Robert a gana e titulo prestigioso di Rey di Tumba un total di cinco biaha. E prome tres consecutivo (1976, 1977, 1978) y despues den 1990 y 1991, consolidando su lugar como un di e compositornan y musiconan mas influyente den historia di Carnaval di Aruba.
𝑃𝑟𝑒𝑚𝑖𝑜 “𝐶𝑟𝑖𝑜𝑦𝑜 𝑑𝑖 𝑂𝑟𝑜” (2023) – Den aña 2023, a honra Robert Jeand’or cu e prestigioso Premio Crioyo di Oro. E reconocimento aki ta un “lifetime achievement award” presenta pa Fundacion Go Cultura na Robert Jeand’or, pa su gran aportacion cultural y musical na Aruba y su papel crucial como embahador cultural internacional. Gobierno di Aruba, pa medio di Ministro di Cultura, a entrega Robert Jeand’or e premio aki.
𝑅𝑒𝑐𝑜𝑛𝑜𝑐𝑒𝑚𝑒𝑛𝑡𝑜 𝑂𝑓𝑖𝑐𝑖𝑎𝑙 𝑑𝑖 𝐺𝑜𝑏𝑖𝑒𝑟𝑛𝑜 𝑑𝑖 𝐴𝑟𝑢𝑏𝑎 – Durante su bida, Robert a ricibi diferente homenahe formal di parti di Gobierno di Aruba, pa su dedicacion y exito den representacion cultural di nos isla. Robert ta un ehempel bibo di nos patrimonio cultural y orguyo nacional.
“𝘋𝘦𝘯 𝘈𝘮𝘣𝘪𝘦𝘯𝘵𝘦 𝘈𝘸𝘢𝘳𝘥𝘴” (1992) – Johnny Ventura mes a viaha pa Aruba pa entrega un reconocimiento special na Robert, exaltando su merito como musico arubiano cu un carera amplio y influyente den mundo di merengue y salsa.
𝑅𝑒𝑐𝑜𝑛𝑜𝑐𝑒𝑚𝑒𝑛𝑡𝑜𝑛𝑎𝑛 𝐼𝑛𝑡𝑒𝑟𝑛𝑎𝑐𝑖𝑜𝑛𝑎𝑙 – Su trabou y colaboracion cu orkestanan mundial y su presentacionan ariba escenario grandi, lo keda como prueba di su impacto internacional. Na Republica Dominicana, Robert tabata conoci como un di e musiconan mas respeta den e genero di merengue y salsa.
𝐔𝐧 𝐄𝐦𝐛𝐚𝐡𝐚𝐝𝐨𝐫 𝐂𝐮𝐥𝐭𝐮𝐫𝐚𝐥
Mas importante cu su talento musical, Robert JeanD’or tabata un berdadero embahador di Aruba. Cu cada nota y cada presentacion, e la mustra cu un isla chikito manera Aruba tin un bos grandi den mundo di cultura y musica. Su inspiracion a habri caminda pa hopi musico hoben di nos isla, y su legado lo sigui vibra den tur nota di salsa, merengue, bolero y musica tropical cu a sali di su man.
𝐃𝐞𝐬𝐩𝐞𝐝𝐢𝐝𝐚
Henter comunidad cultural y musical di Aruba ta lamenta su per
celebra un bida pleno di talento, dedicacion, pasion y entrega.
Departamento di Cultura Aruba ta expresa nos mas sentido palabra di condolencia na su casa Vivian, su yiunan, demas famia, amigonan, compañeronan musico y tur esnan cu Robert a inspira den su bida.
Descansa na pas, E Legendario Robert JeanD’or.
Bo musica y bo legado lo keda eterno den e historia di Aruba y den nos cultura Caribeño.