Diaranson mainta, señor Joe Koolman tabata tin e honor di anuncia cu desde 12 di Januari, 2022 e lo ta asumiendo e puesto di Vice Presidente di COPPPAL pa e region Caribense.
Conferencia Permanente di Partidonan Politico di America Latino y Caribe (COPPPAL) a wordo funda 12 di Oktober 1979 na Oaxaca Mexico. Un grupo di partidonan politico di America Latina y Caribe a uni bou liderazgo di Gustavo Carbajal Moreno, lider e tempo ey di Partido PRI Mexico pa bin cu e iniciativa pa lanta COPPPAL. E tempo ey memey di tur e lidernan grandi di America Latina y Caribe tabata presente Aruba su lider, libertador Betico Croes cu tambe a firma e prome declaracion na OAXACA, Mexico dia 12 di October, 1979.
COPPPAL ta e organisacion politico di mas grandi y mas importante di America Latino y Caribe y a crea un trilateral entre ICAPP, organisacion di partidonan asiatico y CAP partidonan politico Africano pa un total di mas di 700 partido politico. COPPPAL mes ta consisti di 69 partido politico representando mas di 30 pais den Latino America y Caribe.
E funcion di Vice Presidente a wordo eherce dignamente pa añanan largo pa señor Rudy Croes den feliz memoria na unda el a haci, desde 1989, un gran trabou riba nivel internacional pa partido MEP. Na aña 2004, el a introduci señor Koolman cu e mundo político Internacional, y desde e tempo aki señor Koolman ta representando partido MEP riba nivel interncional tambe, cual ta haci cu e tin tur e capacidad pa por eherce e funcion aki debidamente. Esaki sigur ta algo grandi pa pais Aruba mirando e lidernan grandi cu ta forma parti di COPPPAL.
Apart di e posicion di Vice Presidente, señor Joe Koolman tambe lo fungi como Presidente comision Decolonizacion y Colonización di COPPPAL pa full Latinoamerica y di Caribe. Señor Joe Koolman ta encarga pa brinda ayudo necesario den caso cu mester asistencia di COPPPAL.
Tin varios tema cu ta prioridad pa COPPPAL. E tema di soberania, defensa permanente di democracia, institutonan huridico y político y percura pa su desaroyo y su perfecionamento, fortalece e principionan di autodeterminacion di pueblo Latino Americano y Caribe, promove e prinicpionan di integracion regional, promove y defende respet riba temanan di derechonan humano, ta condena y ta contra tur forma di colonialismo, impulsa e desaroyo promoviendo Latino America y Caribe, y accionnan conhunto cu ta duna e posibilidad pa establece orden economico internacional mas husto.
Señor Koolman ta hopi orguyoso di por forma parti di COPPPAL como Vice Presidente di e region Caribense y cu su experiencia lo sa di representa partido MEP y Aruba riba nivel internacional dignamente.
“Pa mi ta un honor y previlegio y mi ta hopi agradecido na Partido MEP, na Lider Evelyn Wever Croes y na COPPPAL y su Presidente Alejandro Moreno Cardenas pa e confiansa grandi aki deposita den mi persona”, Señor Joe Koolman a expresa.
