Camara di Comercio y Industria Aruba (KvK) ta sigui pone enfasis riba e importancia di un pronto recuperacion economico pa nos Pais. E datonan di Banco Central ta indica cu Aruba a conoce un contraccion di 22.3 porciento den e GDP den termino real. Miles di trahado a perde nan trabou of a wordo confronta cu reduccion di nan salario, locual a conduci na diferente aspectonan negativo, manera pobreza, stress y hasta problemanan cu salud mental.
Datonan recien publica ta mustra tambe cu e actividad economico a cuminsa acelera. E factor principal cu a contribui na e mehoracion significante den actividad economico den 2021 ta e sector turistico. Te cu juli 2021 e grado di recuperacion di e cantidad di turistanan tabata 76.5%. Sinembargo, e situacion actual, cu e aumento drastico di e casonan positivo di Covid debi na e variante Delta, ta alterando e panorama positivo aki, como tambe e bienestar general.
KvK ta compronde e aspecto di tuma accion pa baha e nivel di contagio y pa stabilisa e situacion critico y insostenibel na nos hospital. No obstante, KvK no ta partidario di e medida di adelanta e orario di cera negoshi ya pa 9or di anochi. Nos por stimula nos economia solamente bou di condicion cu Aruba por duna un servicio optimal na nos turistanan. Ademas, e contagio ta local y ta proveni di nos mesun residentenan y no di turista, pues mester considera pa dirigi e medidanan na combati e origen di e causa, pero manteniendo condicionnan faborabel pa nos turistanan. E medida di cera negoshi mas tempran ta contrario na e expectativa di nos bishitantenan, esta, recibi un servicio optimal tambe den oranan di anochi y sin mester di rush. Aparte di esey, e medida aki ta un sla duru pa establecimentonan di F&B, e sector economico mas grandi na Aruba, ya cu nan mester cera nan negoshi durante e ora cu ta conoci como “golden hour”.
Camara di Comercio ta urgi gobierno pa reevalua e medida aki y extende e orario di cera negoshi cu por lo menos 1 ora, pa asina por mitiga e efectonan teniendo cuenta cu e otro medidanan cu ta na vigor y di e manera ey crea miho oportunidad pa nos economia por sigui cu e pasonan di recuperacion.