Despues di e apertura oficial di e aña parlamentario nobo, e Lider di Fraccion di AVP, Jennifer Arends-Reyes, a reflexiona riba e importancia di e momento aki, marcando e como un oportunidad pa tur parlamentario renoba nan compromiso cu pais Aruba.
Arends-Reyes a duna di conoce cu, mas aya di e ceremonia, e responsabilidad di e trabou parlamentario ta keda fiho: e funcion di controla, haci preguntanan critico y mantene un postura constructivo pa e mehoracion di e pais.
Analisis di e Discurso di Gobernador y Proyectonan di Ley
Den e discurso di Gobernador, a menciona varios proyecto y iniciativanan di ley cu mester wordo trata den Parlamento den e proximo periodo. E Lider di Fraccion a subraya cu hopi di e iniciativanan aki ta enfoca riba e bienestar social di e comunidad.
Hopi di e ley- y proyectonan aki tin cu yega directamente na pueblo. Esaki ta haci nos contento y como fraccion nos kier mira nan concretisa. E ta un reto pa trata tanto ley den Parlamento, pero hopi di nan ta topiconan social cu pa añanan largo a wordo debati,” Arends-Reyes a declara. Den e contexto aki, e parlamentario a menciona e necesidad pa duna sosten na e cuido di termino largo (langdurige zorg) y e apoyo necesario pa e hobennan y famianan cu ta spera e solucionnan aki.
Prioridad den Turismo, Seguridad y Infrastructura
E Lider di Fraccion di AVP a resalta cu durante e aña parlamentario nobo lo duna atencion
na pilarnan clave di e sociedad:
Turismo y Reparticion Economico: Arends-Reyes a señala cu stakeholder meetings ta tumando luga pa recalibra e sector turistico. E meta ta pa percura cu e beneficionan economico yega mas cerca di e comunidad y cu fondonan por wordo redestina pa e bienestar general.
Infrastructura y Fondo di Inversion: A reconoce e retraso grandi cu tin den mantencion di infrastructura debi na e falta di inversion den e añanan pasa, specialmente durante e pandemia di COVID-19. Actuamento ta trahando riba e presupuesto di e Fondo di Inversion (IOF), cu proximamente lo wordo trata den Parlamento pa cuminsa dirigi recurso na e mantencion necesario.
Prioridadnan Adicional: Atencion lo keda dirigi riba area y sectornan crucial manera enseñansa, siguridad, naturalesa, aspecto social y salubridad publico.
Un Vision Positivo pa e Futuro
Arends-Reyes a conclui cu e fraccion di AVP ta drenta e aña parlamentario aki cu hopi motivacion pa ehecuta nan tareanan y pa impulsa proyectonan cu ta beneficia e pueblo Arubiano directamente.