Politica

Lider di fraccion di AVP mr. Mike Eman Recorte salarial di maestronan di scol ta espantoso


Awor cu maestronan di scol ta haya nan loonopgaaf 2020 y compara esaki cu 2019 ta bira espantosamente evidente cuanto gobierno Wever-Croes a corta den salario di maestronan di scol. Den un conferencia di prensa e líder di fracción di AVP, mr. Mike Eman, a expresa su preocupacion pa cu esaki y a comparti cu prensa diferente ehempel cu cifranan di loonopgaaf cu ta comproba e perdida grandi di entrada di maestronan di scol. Durante su presentación Eman a duna tres ehempel di educadornan di diferente sector den enseñanza. Banda di e perdida di entrada cu mester ta hopi penoso pa e maestro y su famia, líder di fracción di AVP ta teme tambe un perdida grandi di motivación cerca educadornan di nos yiunan.

Maestra di deporte escolar

Un maestra di scol cu un opleiding di bachelor den educación físico na 2019 tabatatin segun e loonopgaaf di 2019 un zuiver voljaarsloon di Afl. 35,164.25. Cu recortenan di Gabinete Wever Croes segun e loonopgaaf di 2020 e zuiver voljaarsloon di e maestra aki a cay te na Afl.28.811,11. E maestra a perde Afl. 6353,14. Esaki ta mas di dos luna di salario.

 Maestro na Colegio Arubano

Un maestro di scolnan avansa preparatorio pa nos futuro academico y profesionalnan, Colegio Arubano, tambe a conoce un perdida astronomico di entrada cu e medidanan di Gabinete Wever-Croes. E maestro na Colegio Arubano cu un opleiding den educación di un of masvak na 2019 tabatin segun e loonopgaaf di 2019 un zuiver voljaarsloon di Afl. 97,750.83. Cu recortenan di Gabinete Wever Croes segun  e loonopgaaf di 2020 e zuiver voljaarsloon di e maestro aki a cay cu Afl. 14,121,07 te na Afl. 83,629.76. Eman ta puntra su mes con por tene maestronan motiva y dedica na nan trabao di formacion di nos futuro generacion cu tipo di reduccionnan inhusto asina. Eman ta bisa cu e reduccion aki ta locual practicamente tur maestro na scolnan secundario a experiencia na 2020. Y cu esaki lo ta pio den 2021, pasobra e medidanan di Gabinete Wever Croes a drenta na vigor na mei 2020. Es decir cu nan no tabata apicabel ainda den henter aña 2020, pero si lo ta e caso den 2021.

Maestra di scol pa muchanan special

Mes tragico ta locual ta pasando cu nos educadornan na e scolnan pa muchanan special. Aki ta unda por ta mas cu cualkier scol nos mester di maestronan cu e preparacion y tambe e motivacion pa por brinda nos muchanan cu limitacion un educacion y atencion intensivo. Algo cu sigur ta exigi hopi tanto psychologicamente como fisicamente di nos educadornan pa muchanan special. Nan ta wordo prepara pa ta specialisa den nan profesion y tarea bunita aki. Un maestra di scol pa muchanan special cu un opleiding di Master den educacion pa muchanan special na2019 tabatin segun e loonopgaaf di 2019 un zuiver voljaarsloon di Afl. 87,354.41. Cu recortenan di Gabinete Wever Croes segun e loonopgaaf di 2020 e zuiver voljaarsloon di e maestro aki a cay te Afl. 71,142.59. Un recorte di Afl. 16,211.82. Esaki ta practicamente dos luna di salario cu e maestra aki a perde cu e medidanan di Gabinete Wever Croes.Un situacion inacceptabel, segun e líder di fraccion di AVP, mr. Mike Eman.

 

Sin perspectiva pa mehoracion

Eman ta bisa cu e demotivacion den e mundo di educacion ta bira aun mas severo awor cu den tur probabilidad e medidanan aki cu a bin na vigor 1 di mei 2020 cu e “Landsverordening houdende regels tot versobering van de uitkeringen en bezoldigingen etc” no a stipula fecha di su terminacion. Na empleadonan a wordo bisa cu e medidanan takeda vigente “tot nader orde”. Mientrastanto e mesun empleadonan aki cu ta haciendo sacrificio grandi mester mira decisionan manera “Golden handshake” di miyones pa core cu directornan di companianan di utilidad sin hustificacion na interes di e companía of interes di Aruba. E líder di fracción di AVP mr. Mike Eman ta considera e situacion aki uno cu ta fomenta un malcontento nacional y un demotivacion general den nos comunidad.

Related posts

Lider polítiko di MFK a test positivo pa COVID-19

EA News Author

Fundacion pa gobernacion di calidad a haci analisis mas profundo riba e funcionamento di Aruba su identidadnan

EA News Author

Parlamentario Endy Croes: Den crisis mester evalua tur posibilidad Ta boga pa kita Standard Europeo y importa galiña di Brazil prijs lo baha cu 20%

EA News Author

Leave a Comment