Den un bishita recien na e mercado di Santa Rosa, e lider di fraccion di PPA, Eduard Pieters, a haci un yamada fuerte pa reforsa e sector primario di Aruba. Durante su bishita, caminda ta probecha pa adkiri productonan fresco manera lechuga y bonchi, Pieters a boga pa solucionnan concreto riba tereno di awa, tecnologia y maneho di plaga di cacho y pushi pa garantisa e futuro di agricultura riba e isla.
Sosten pa e cunukero y producto local
Pieters a describi e mercado como un escenario vibrante caminda homber y muhe ta traha duro pa produci for di e suelo di Aruba. “Nos ta mira e necesidad den tur caso pa sigui sostene nan,” el a declara, resaltando e calidad di e productonan cu ta keda cosecha localmente. Den un tono mas informal, el a extende un invitacion na su colega parlamentario, Sr. Bermudes, pa e tambe bishita Santa Rosa y sostene e produccion propio y mira e importancia di esaki.
Desafionan critico: Awa y plaga di cacho y pushi
Durante su combersacionnan cu e productornan, Pieters a identifica puntonan prioritario cu mester di atencion politico inmediato:
- Maneho di awa: Awa ta keda e factor mas determinante. Pieters a propone un bista nobo riba e servicio di RWSS (Water Service), enfocando riba con pa converti “awa sushi” den awa di riesgo pa plantacion y yerba pa bestia den un forma duradero y economico.
- Control di plaga: E cunukeronan a comparti nan preocupacion pa e daño causa pa iguana, lagadishi y malesanan cu ta bini via aire. Segun Pieters, scucha e relatonan aki ta esencial pa un parlamentario por formula legislacion of yudansa cu realmente tin impacto. Pero tambe a enfatisa riba e situacion di Pushi y Cacho riba caya cu ta haya e sosten financiero mas cu sector di agricultura.
Mirando pa futuro, e lider di PPA ta kere firme den e combinacion di metodonan tradicional cu tecnologia moderno. “Aruba mester busca un manera pa nos combina tecnologia hunto cu plantacion riba suelo,” el a splica, mencionando tambe alternativanan manera vertical farming pa optimisa e poco tereno disponibel na e isla.
E argumento mas fuerte di Pieters a keda basa riba e realidad geopolitico actual. Cu mas di 90% di e productonan alimentario siendo importa, e ta considera e situacion aki un riesgo pa e pais. “Nos mester baha di 90% pa 70% of 60%, pa nos no depende completamente riba importacion di exterior,” Pieters a enfatisa.
Pieters a anuncia cu pronto e lo tin un reunion formal cu e Asociacion di Cunukeronan Arubiano pa profundisa riba e puntonan aki y busca con Parlamento por fungi como un facilitado mas efectivo pa e sector agricola.
