Apenas 75 dia despues di eleccion AVP y Futuro ta demostra “un biaha mas” cu nan
prioridadnan no ta alinea cu e necesidadnan di pueblo. Pa 7 aña largo, Mike Eman y AVP, hunto
cu Gerlien Croes di Futuro, a grita cu Aruba ta conoce hopi pobresa. Nan a insisti cu e mester
duna ayudo na famianan y Mike a insisti cu e lo aumenta pensioen pa nos grandinan cu AWG
700,-. Sin embargo, nan accionnan recien ta contradiciendo nan “supuesto preocupacionan”
durante e añanan cu nan tabata den oposicion.
Sorprendentemente, Mike Eman na varios ocasion a critica e bahamento di loonbelasting di
Gabinete Wever-Croes, cu a alivia e carga financiero riba mas di 17 mil persona. Mayoria
ciudadano a haya alrededor di 300 florin bek den nan cartera! Mike su reaccion ta un
contradiccion flagrante cu ta laga nos puntra nos mes: Mike y Gerlien ta realmente preocupa pa e
bienestar di pueblo?
Como sifuera poco, Mike Eman a anuncia cu e kier 7 staatssecretaris; un pa traha cu cada
minister. E decision aki lo aumenta e gastonan di gobierno drasticamente. Cada staatssecretaris
lo mester di un ekipo completo: consehero, coordinador, hurista, secretaria, media staff, werkster
y chauffeur. Cuanto hende mas lo mester dal cabes den cocolishi? E propuesta aki ta parce mas
un intento pa crea posicionnan pa miembronan di partido y famia, enbes di un plan pa mehora
gobernacion. E gastonan di personal cu tabata bao control na un poco mas cu 2 miyon pa aña
durante e gabinete Wever-Croes, awor tin e riesgo di subi bek te na 12 miyon pa aña. (Mescos cu
na 2009-2017) Esaki ta un aumento alarmante cu lo pone mas presion ainda riba e presupuesto di
pais Aruba, mientras cu hopi ciudadano ta luchando diariamente pa pone pan riba mesa.
Pa colmo, despues di un bishita na Gobernador, Gerlien Croes a contradeci Mike Eman den su
cara, declarando cu e "no sa nada" di e plannan pa inclui 7 staatssecretaris den un gobierno y cu
no a negocia cu AVP riba e tema. E contradiccion aki ta pone Mike Eman den un posicion
incomodo y ta laga pueblo confundi tocante e berdadero intencionnan di e alianza entre AVP y
Futuro. E hilaridad en cuestion ta, cu e funcion di staatssecretaris no ta aparece den nos leynan y
pesey no por wordo formalisa den un gobernacion.
Mientras cu Mike ta purba yena cocolishi cu su hendenan, e costonan di bida ta sigui subi na
man di minister di Futuro sr. Geoffrey Wever, cu a subi prijs di gas cu mas di 50%, poniendo
asina mas presion riba famianan den necesidad. Ken ta corda e video emocional den cual
minister Geoffrey Wever, cu un cara preocupa, a declara cu Futuro su plan ta pa subi poder di
compra di pueblo y lo yuda cu varios toeslag?
Na final, loke nos ta mira ta un scenario preocupante: dos partidonan cu a priminti 7 ministerio,
awor ta propone 14. Pueblo ta puntra si esaki ta e “politica nobo” di Futuro y e “bon comun” cu
Mike Eman a promete. Ta parce e prome 100 dianan lo ta pa yena saco politico prome, mientras
Oppa a bisa cu Mike lo no cumpli cu aumento di pensioen. Kico mas lo por spera di un coalicion
nobo cu a sali asina malo y no a sinta mes ainda?