Comunidad di Aruba ta den luto cu e fayecimento di Randolf Vrolijk, conoci cariñosamente Mr Vrolijk, un educador di curason y un visionario den e sector di enseñansa. Meneer Vrolijk a bay sosega ayera nochi, despues di un tempo largo cu e tabata lucha cu problema di su curason.
Cu su partida, Aruba ta perde un homber cu a duna su bida y alma na herment di conocemento pa nos pueblo.
Pa hopi aña largo, Mr.Randolf Vrolijk a fungi como un docente y meneer dedica, cu semper tabatin enseñansa na pecho. Su pasion no tabata solamente pa duna les, pero pa guia, inspira y motiva su alumnonan pa logra mas den bida. E tabata mira potencial unda otronan no tabata mira nada y a laga un marka indelibel den bida di centenares di alumno cu a pasa den su clasnan y su fundacion.
Un di e logronan mas grandi y balioso di meneer Randolf Vrolijk den nos comunidad tabata e fundacion di FEPA. Comprendiendo cu educacion no mester tin edad y cu hopi ciudadano tabatin mester di un segundo oportunidad den bida, el a lanta e instituto aki cu un meta claro: duna tanto hende grandi como hoben e oportunidad pa sigui studia, fortalece nan conocemento, y haci cursonan practico.
Danki na e iniciativa pionero aki, un cantidad sin fin di persona a logra drenta of re-drenta e mercado laboral cu confiansa, mehorando nan posicion y futuro profesional. FEPA ta keda como un testamento bibo di su vision inclusivo y su amor pa e progreso di su pais.
Meneer Randolf Vrolijk lo keda corda como e educador noble, balente y semper serviñal cu a pone e progreso humano na prome lugar. Maske e no t’ey mas cu nos, su enseñansa, su consehonan y e semiya di conocemento cu el a planta den curason di su muchanan, hobennan y adultonan lo keda fructifica pa semper.
Mr Randof ta ruman homber di Parlamentario Edgar Vrolijk
Nos di EAnews ta manda nos mas sincero palabra di condolencia na su famia, sernan stima, y tur esnan cu tabata conose y aprecia meneer Randolf Vrolijk.
Cu su alma sosega na paz.
