Partido MEP ta invita pueblo di Aruba pa participa den un serie di actividadnan special pa conmemora Dia di Himno y Bandera, incluyendo un fiesta grandi, un exposicion historico y un marcha di flambeu.
Segun Parlamentario Endy Croes, e celebracion lo tuma luga na cede di MEP, unda lo tin un ambiente festivo cu musica y participacion di comunidad. Ademas di e fiesta, lo tin un exposicion cu ta enfoca riba historia di Status Aparte y desaroyo di bandera di Aruba,pa duna bista un oportunidad pa conoce mas profundo riba e herencia nacional.
Un di e punto culminante di e programa ta e marcha di flambeu, un actividad simbolico cu ta representa unidad y orguyo nacional. E marcha ta invita participacion amplio di comunidad, fomentando un sentido di union entre ciudadano nan.
Croes a enfatisa cu e celebracion no solamente ta un momento di fiesta, pero tambe un oportunidad pa reflexiona riba e trayecto di Aruba como pais. E evento ta marca 40 aña di Status Aparte y 50 aña di Himno y Bandera, dos milestone importante den historia di Aruba cu awe ta na peliger den man di gobierno di AVP-FUTURO.
“E invitacion ta habri pa tur hende bini hunto como un solo pueblo, pa celebra y reflexiona riba nos identidad y futuro,” Croes a indica.