Parlamentario Mike de Meza a expresa su preocupacion profundo riba e forma con wega di poder politico ta wordo hunga y con ta uza ambtenaar den situacionnan cu ta inaceptabel. Si ta e caso cu un Minister ta uza un ambtenaar, Aruba no por encamina un caminda asina paso e lo kibra su mes y ta inaceptabel. E parlamentario ta subraya cu a yega e momento pa ta transparente cu pueblo di Aruba y enfrenta e realidad di e casonan aki cu ta afecta integridad di persona y ta inaceptabel.
Segun De Meza, durante e momentonan dificil cu el a pasa aden, el a comparti cu su coleganan di partido cu e situacion tabata inaceptabel. E ta mustra cu ora un politico ta uza poder riba nivel di ambtenaar, esaki ta warda un perdida di confianza den institucionnan y departamentonan cu ta sumamente importante pa Aruba.
Nos como politico, parlamentario, minister, ta prome yama cu tin cu tuma accion pa corigi esaki y trece bek confianza den pueblo,” De Meza a enfatisa.
E parlamentario a comparti cu e periodo aki tabata un “nightmare” (camber di nochi) pa su persona, su famia y su sernan keri. El a expresa cu a tuma luna pa por a comprende con departamentonan y mal uso di poder por hinca un persona den un skina, lagando un marca grandi den comunidad.
Maske e caminda tabata duro y a costa placa, cabey greis y hopi dolor, De Meza ta keda firme cu e ta un persona limpi cu no tin nada di sconde. El a gradici e Ministerio Publico (OM) cu na cierto momento a recapacita y mira cu e caso no tabatin base, bisando cla cu e no tin ningun culpabilidad.
De Meza a conclui bisando cu e ta keda alerta contra e tipo di accionnan aki cu ta pone duda riba integridad y persona, afirmando cu ta tempo pa para fuerte y enfrenta tur forma di mal uzo di poder den comunidad.
Banda di esaki te dia di awe no a scucha Minister Geoffrey Wever bin padilanti riba un caso asina grandi cu ta cay bou di su maneho. Ultimo dianan aki tanto Minister Gerlien Croes y Minister Greoffrey Wever ta scondi bou di baranca.