Mike Eman: Ta doloroso pa perde un bon miembro di partido

Lider di partido AVP despues di e anuncia di retiro di Parlamentario Gerlien Croes, a admiti cu tin un caminda pa cana y ta cuminsa prepara pa un biaha mas rescata e país manera cu a haci den pasado.

Mike Eman a bisa cu e no ta tuma e retiro di e tres candidatonan di menos importancia, pero e ta sirbi pa yuda nan sigui prepara.
E ta doloroso y mas doloroso pasobra no kier perde un bon miembro di partido, Mike Eman a cuminsa su declaracion net despues cu Gerlien Croes a caba cu su conferencia. Hasta el a brasa Croes y a bis’e exito.

“Esaki sigur ta algo cu nos kier a evita. Nos a inverti hopi tempo riba diferente nivel, cu esnan envolvi y cada bes a pone Aruba padilanti, e isla cu ta warda riba un AVP grandi.” E no tabata e momento oportuno cu e partido ta hay’e cu e tipo di divisionnan aki. Croes tabata wordo mira como futuro dirigente y a mir’e como e persona cu lo bay carga e partido den futuro. P’esey a dun’e espacio pa carga e partido den tur sorto di reunion tanto na Aruba como den exterior, como e bos di esnan cu tin un pensamento diferente. “E esfuersonan no a resulta pa mantene Gerlien den partido.”

AVP tin un responsabilidad hopi mas grandi awo pa trece tur hende hunto, pa trece e vision pa salba Aruba. Esaki tabata un parti di e declaracion di e lider di partido AVP.
El a recorda cu Gerlien ta bini di un famia, troncon di partido AVP, di un trayectorio largo. P’esey a desea cu lo por a anuncia cu e compromiso lo sigui hunto. Pero esey no tabata e caso. Cada persona tin su derecho pa tuma e direccion cu e kier, y esnan cu ta keda sostene AVP pa uni pa forma un forsa grandi pasobra AVP tin un responsabilidad grandi pa drecha y bini cu solucion pa e pueblo di Aruba.
Na final el a bisa cu awo lo percura pa trece tur hende hunto y atende cu e reto cu e vision y meta pa sirbi e pais aki.