Declaracionnan reciente ta pone enfasis riba preocupacion di parti di comunidad tocante consistencia entre promesanan di campaña y accionnan actual di gobierno AVP-FUTURO.
Segun Dangui Oduber riba su pagina di Facebook ta indica cu durante campaña y formacion di gobierno, minister Gerlien Croes tabata indica cu ningun minister lo bay busca ni uza auto oficial como medida pa reduci gasto publico. Sinembargo Minister Gerlien Croes mes ta pone un post y ta haci promocion pa un compania di autonan electrico/hybrid cu ya caba Minister Geoffrey Wever a intruduci como autonan di Post Aruba cu te dia di awe no a mira un destaho publico pa esaki. Di kico realmente nos ta papiando aki ?
E situacion a provoca reaccion fuerte di parti di ciudadano nan, cu ta cuestiona e coherencia entre loke a wordo prometi y loke ta wordo implementa actualmente. E preocupacion principal ta centra riba responsabilidad fiscal y uzo adecuado di fondo publico y tambe aprobacion via di un destaho publico pa un fare chance pa tur compania di auto na Aruba.
Criticonan ta enfatisa cu transparencia y cumplimiento di compromisonan politico ta esencial pa mantene confianza di pueblo den gobierno. Fraccion di MEP ta pidi claridad riba e decisionnan tuma y e rason patras di e gastonan relata.
E tema aki ta forma parti di un discusion mas amplio riba gobernacion, responsabilidad y e manera con recurso publico ta wordo maneha y ta importante pa minister nan bin parlamento y duna cuenta na pueblio di Aruba riba e desicionnan aki cu no ta transparente.