Aruba su nomber ta bolbe wordo menciona riba tarima internacional
Minister Maduro ta informa cu e grupo di artista Ritmo Cubano Company Aruba (RCC Aruba) lo representa Aruba durante un audicion na America Got Talent (AGT).
Aña pasa e grupo di artistanan aki a participa na un competencia internacional di Circo ‘Budapest Circus Festival’ na Hungria, representando Pais Aruba. RCC Aruba a gana e tercer premio y un premio special. Esaki ta un premio cu ta wordo otorga pa e grupo cu a haya mas aceptacion di e publico. E participacion na e Festival Internacional aki a pone cu RCC Aruba a haya hopi atencion internacional y tambe contratonan na Circonan di renombre internacional.
E promotornan di e programa America Got Talent tambe a keda impresiona cu e presentacion di RCC Aruba y a invita e Grupo di artista pa presenta den AGT. Pa haci esaki tabata henter un proceso, ya cu RCC Aruba mester a haci dos presentacion prome y si nan pasa e presentacionnan aki, nan lo por haci e audicion di AGT. RCC Aruba a completa e presentacionnan cu exito y lo ta riba tarima internacional un bez mas promoviendo Aruba su nomber.
Minister di Cultura ta invita un y tur pa sintonisa canal 15 diamars dia 26 di juli pa 8’or di anochi, pa presencia e presentacion di RCC Aruba. Minister Xiomara Maduro ta gradici tur e artistanan di RCC Aruba pa e tremendo trabou cu nan ta haci promoviendo Pais Aruba internacionalmente.
