ORANJESTAD, Aruba
Riba invitacion di Minister di Desaroyo Teritorial, Infrastructura y Medio Ambiente Marisol Lopez – Tromp, a tuma luga un reunion cu Stichting Parkietenbos Aruba diamars 18 di februari. E tema di e reunion tabata: Maneho di desperdicio y preocupacionnan di e fundacion. A organisa e encuentro aki despues di cu recientemente a tuma nota di accion di SPA den medionan di comunicacion riba e situacion di dump. E encuentro a tuma luga conhuntamente cu Prome Minister Evelyn Wever – Croes, pa cual SPA a gradici pa e invitacion y e oportunidad pa expresa nan mes.
Na e ocasion e representantenan a mustra riba e accion di firma andando contra e molester como consecuencia di dump, cu te cu aworaki ta conta cu mas cu 2000 firma.
Ademas, e fundacion a presenta dos peticion specifico cual ta:
1. Pa cera e dump na Ser’i Teishi inmediatamente. Door di holor cu ta insoportabel pa habitantenan y a expresa preocupacion pa posibel gas toxico.
2. Pa tuma accion y prohibi e kimamento di taira y sushi procedente di cura di cas riba dump.
Pa locual ta e peticionnan aki, e fundacion a propone pa medidanan wordo tuma pa sanea dump mas liher cu ta posibel y pa introduci un maneho di desperdicio sostenibel.
Di parti di Gobierno di Aruba a splica ki pasonan cu ta tumando y a trata tambe con por yega na un solucion a corto y largo plaso. Finalmente a haci palabracion cu lo keda den contacto structural cu SPA tocante desaroyonan riba e tema.
