Atleta Olimpico Monica Pimentel cu sigur ta bon conoci den mundo di deporte pa no solamente su carera deportivo, pero tambe como presidente di e comision di atleta y entrenadora nacional di Taekwondo, a logra termina su stage na Comite Olimpico Arubano (COA). E stage aki a tuma luga como parti di su studio di e Bachelor Program “Organization, Governance and Management” (OGM) na Universidad di Aruba.
Durante su stage na COA, Monica a forma parti di e Direccion di Desaroyo y a traha hunto cu Director Patrick Werleman, unda a organisa un gran cantidad di curso manera “Capacity Building Training”, “Sports Adminstration Course” y e Anti-Doping Conference 2026. Banda di e cursonan e la aporta na diferente departamento dentro di COA y a mustra di ta un hoben profesional cu hopi capacidad y cu gran deseo di traha na bienester di deporte na Aruba.
COA ta felicita y gradici Monica pa su tremendo aporte y su compromiso na traha pa deporte. Monica ta mustra cu e dedicacion y disciplina di ta un atleta di nivel Olimpico ta traspasa pa tur area di nan bida, incluyendo e parti profesional. Pabien Monica!
#COA #ARUBA #OGM #OLY #TEAMARU
