Varios carta a bay pa minister Arthur Dowers pa bin parlamento mirando e caso di Ayden Lanoy a keda para. No ta desconoci cu a duna un tempo di tres luna cu famia di e defunto lo haya un resultado, tanto gobierno y ministerio publico a priminti esey.
Sinembargo ta mira cu tempo ta sigui cana y no ta mira ningun movecion y accion riba e investigacion aki . Famianan ainda tin hopi pregunta y tin hopi duda di hopi cos, pero ta biba cu nan ansiedad y curason dolor di no por cera e capitulo aki di nan yiu.
Un mama y un tata cu curason kibra cu di un dia pa otro a perde nan yiu door di dos polis cu a dicidi di sigui cu un persecucion cu nan a haya e mensahe pa stop cu e persecucion y a opta pa tira no 18 pero 20 bala den direccion di e hoben cu tabata trata di huy sin un intencion di pone nan bida na peliger , pero e propio polisnan mes a pone nan bida na peliger na momento cu den un caminda sin salida ta tira riba un hoben cu desesperacion di huy for di polis pa un motibo cu te ainda no a Sali afo dicon e persecucion aki realmente a cuminsa. E hoben inocente tabata kisas “in the wrong place and at the wrong way ” cu e persecucion aki a cuminsa realmente ? Kico esaki por bisa y conduci ?
Preguntanan a keda manda na minister di Husticia y esaki nan no a keda contesta te ainda door di e mandatario na parlamento. Nos no por lubida cu un hoben a wordo kita for di e mundo aki pa motibo di un encuentro cu tabatin dos agente policial a tuma un postura como polis no corecto. Te ainda comunidad di Aruba ta sumamente preocupa. Tambe tin amienda nan cu a keda presenta na unda cu kier pa polir nan tin bodycam y dashcam, apoya psicologico na polisnan y test di droga den cuerpo policial. Nada di e puntonan aki a haya atencion di minister di Husticia, pero na mes momento parlamento no por laga e aspectonan aki drumi.