Fraccion di MEP den Parlamento a entrega preguntanan na minister interino di Energia, señor mr. Arthur Dowers, tocante e nombracion recien di señor Frederick Nuboer como miembro di Conseho di Supervision (RvC) di Utilities Aruba N.V. y Refineria di Aruba N.V.
E fraccion ta expresa preocupacion riba e nombracion aki, mirando e pasado di señor Nuboer. El a sali for di su puesto como presidente interino di Algemene Rekenkamer den 2021 despues di un incidente di buracheria den publico. Prome cu esey, como director di Insel Air Aruba, tabatin cuestion di mal maneho financiero y di no paga impuesto ni prima.
“Nombracion di comisario den empresa estatal importante mester ta basa riba integridad, transparencia y capacidad,” segun e fraccion di MEP. “E pasado di señor Nuboer ta lanta duda serio tocante su aptitud pa vigila e tipo di empresa aki.”
Fraccion di MEP ta pidi entre otro:
• Claridad riba e proceso di nombracion,
• Si a tuma luga un evaluacion di integridad,
• Y si e gobierno ta dispuesto pa reconsidera e nombracion aki.
E fraccion ta enfatisa cu confiansa den gobernacion ta fundamental y cu transparencia mester guia cada decision publico.