Pa parlamentario Otmar Oduber, di fraccion di PPA, San Nicolas merece hopi mas di gobierno, specialmente mirando su historia di desaroyo economico cu el a sa di brinda henter Aruba. Sinembargo e duda cu un biaha mas San Nicolas ta bay den olvido, no ta algo cu e por djis acepta. Durante su disertacion den Parlamento, parlamentario Otmar Oduber a lansa un apelacion fuerte y emotivo na gobierno: “Nos no por sigui trata San Nicolas manera un segundo rango. E ora ta awo, no mañan!”
100 aña di gloria, 40 aña di abandono
San Nicolas y Aruba completo a biba mas di un siglo di desaroyo, un centro di industria, cultura y progreso. Pero durante e ultimo 40 aña el a keda limita na proyectonan cosmetico: tapa un herida sin traha riba sanacion completo. Mientras nos papia di “un solo Aruba”, realidad ta mustra discriminacion y falta di compromiso real cu San Nicolas.
Miyones disponibel, pero niun boluntad
Segun Oduber, Aruba tin surplus, tin fondo extra, tin miyones cu por uza pa inversion. “Con ta posibel,” el a puntra, “cu nos no por drecha e cosnan chikito cu ta haci un pueblo grandi?” Bulb di trafico paga cu ta pone bida den peliger, e casnan bandona cu duna un bario cara y sentimento di abandono, un mainstreet cu keto bay ta den mesun estado. No ta trata di cosnan imposibel, pero si ta trata di cosnan cu ta falta di liderazgo y boluntad.
Cambio di Mentalidad
Otmar ta aplaudi y ta apoya e proyectonan grandi manera; MFA San Nicolas, De Vuyst, y mas cu gobierno a presenta. Pero segun Oduber, e cosnan chikito cu ta importante pa duna bida real di pueblo, ta sigui sin atencion. “Basta cu keda bay den pasado di 2017. Basta cu bolbe na politica bieu. Nos mester pensa kico por haci awor na 2025. Un cambio di mentalidad real,” el enfatisa despues di a ricibi expresion di minister Croes di Futuro.
Y p’esey mes Otmar a hasta reta parlamentario Otami di AVP, cu ta na turno despues, p’e duna su comentario y sali na vanguardia di San Nicolas, como un politico di San Nicolas. “Ke hubo, cu en bes nos keda pensa riba 2017, ban pensa riba 2025 anto ban pone e fondonan necesario, caminda e gobierno aki ta bay ruim op San Nicolas manera mester ta; haci e barionan limpi, pone luz, pone seguridad, drecha mainstreet.
Finalmente Otmar Oduber a indica hopi cla cu San Nicolas tin un hotel nobo, un logro grandi despues di mas di 40 aña ta purba. “Esaki ta danki na esfuerzo di nos tur. San Nicolas ta pidi respet, seguridad, claridad y dignidad. Ban crea e posibilidadnan un biaha mas pa loke ta trata San Nicolas y porfin despues di 40 aña nos a logr’e y nos niun no t’ey pa sostene e hotel aki p’e bira exitoso pa San Nicolas.”