Politica

Parlamentario Alan Howell contento cu e resultado di crimennan soluciona pa Cuerpo Policial


ORANJESTAD,Aruba

Diabierna den sala di Parlamento, Minister di Husticia a contesta e 12 preguntanan haci door di parlamentario Alan Howell relaciona cu e preocupacion cu ta reina cerca su persona y den pueblo pa loke ta atraconan cu ta tumando lugar riba nos isla. 

E mandatario a contesta tur 12 pregunta y Alan Howell kier a gradici Minister Andin Bikker pa duna atencion rapidamente na su yamado y contesta e preguntanan cu ta reina den pueblo.

Pa loke ta e pregunta di cuanto atraco a tuma lugar riba Pais Aruba di november 2019 pa januari 2020, a haya e respuesta cu durante henter 2019 tabatin 46 atraco y for di november 2019 pa januari 2020 a constata un total di 15 atraco. Importante pa menciona cu esaki ta un reduccion grandi compara cu e 116 atraco cu a tuma lugar na 2017, pero debi na e aumento di atraco na final di 2019, e aña aki a subi compara cu e 34 cu a tuma lugar na 2018.

Despues di a scucha e respuesta riba cuanto di e atraconan aki a wordo soluciona, Howell a felicita Cuerpo Policial mirando cu e porcentahe di casonan resolvi ta sumamente halto y ta riba  90%. Adicionalmente e mandatario a informa cu durante 2019 tabatin 79 aresto.

A keda constata cu varios di e atraconan cometi na Aruba ta den man di stranheronan y mas specifio venezolanonan. E mandatario a bisa cu a constata cu for di november bin ariba, practicamente tur e sospechosonan ta di nacionalidad venezolano. Di e 79 arestonan cu a tuma lugar aña pasa, 53 tabata personanan local y un grupo di 26, cual ta 33%, ta extranheronan. Di e total di extranheronan 17 ta procedente di Venezuela.

E respuesta pa e pregunta riba un solucion sostenibel y efectivo pa atende cu e malechornan exntrahero aki, tabata cu ta sigui cu e controlnan severo pa loke ta e leynan di admision y expulsion. Desde november aña pasa a instituí Warda Nos Costa como un dienst riba su mes y for di januari nan a cuminsa cu controlnan severo pa loke ta trata violacionnan di nos leynan di admision y expulsion. E ley pa loke ta ESTA, APUS y PNR lo ta cla dentro di poco, cu e introduccion di esakinan lo por haci un prescreening hopi mas extenso prome cu e personanan yega Aruba y lo por preveni pa nan drenta nos isla den caso cu ta constata iregularidadnan. Den caso di e malechornan condena na Aruba, nan ta sinta nan castigo y despues ta wordo repatria.

E preguntanan riba cuanto di e casonan a wordo trata den corte caba y cual ta e castigonan exigi, Minister Bikker a contesta cu mirando cu ta trata di casonan recien y por spera cu den e siguiente simannan of lunanan e casonan aki lo bin dilanti den corte, pero importante ta cu e sospechosonan ta deteni y e castigonan ta depende di e circunstancia di e caso. Si el a bisa cu Ministerio Publico ta exigi castigonan halto, pero tambe por mira cu corte ta ripara cu sociedad kier wak castigonan cu ta refleha e seriedad di e casonan. Ademas tin dos ley cu ta bayendo pa Parlamento pa aumenta e castigonan pa cierto crimennan manera entre otro abuso di mucha y e otro ta cu lo update diferente leynan.

Howell a puntra tambe ki pasonan lo tuma pa preveni mas atraco? Pa Minister Bikker, prevencion ta keda e factor di mas importante, pero tambe a fortifica e maneho hudicial existente. A reactiva e sistema di camara, lo instala camaranan mas moderno y lo pone unda cu no tin, e ultimo aki desde Welcome Plaza te Renaissance. San Nicolas tambe lo haya e camaranan moderno aki na e Carnival Village. Ta mirando e posibilidad di reintroduci e Visibility Team y lo bin un klas den 2020 pa polis. Tambe ta haciendo e preparativonan pa introduccion di dronan hibrido. 

Mirando e importancia di turismo a puntra ki pasonan adicional a wordo tuma pa preveni atraconan den e area turistico? Riba esaki ta importante pa tin visibilidad den e area turistico, a pone e oficina di TOP (Tourism Oriented Police) banda di e puerto di crucero, a haya for di Aruparking lugarnan pa polisnan por para nan auto unda cu ta visibel riba Boulevard y ora e camaranan pa e area aki bin, esaki lo ta extra bon vigila.

Otro pregunta ta si hotelnan, joyerianan, banconan y otro negoshinan vulnerabel a wordo poni na haltura  y conseha pa tuma extra precaucion di nan parti tambe? Minister a institui un comision cu lo reuni cu e stakeholdernan di casino, joyeria, hotelnan, scolnan, banconan y tur otro sector vulnerabel pa haci un assessment di kico nan tin ‘in place’ caba, con por mehora e ‘safety by design’ y tecnologia. Ta buscando tambe a traves di diferente medio hisa e nivel di seguridad. Lo bin tambe cu programanan di certificacion pa companianan di vigilancia y seguridad y yega despues na un cooperacion cu polis pa mehora e seguridad riba nos isla. 

Minister Bikker a indica cu Departamento di Atraco Team tin suficiente material y personal na e momentonan aki, pero na momento cu nan tin mester di algo lo provee esaki.

E ultimo pregunta ta con Parlamento por contribui na logra un solución sostenible y e mandatario a bisa cu e ta agradecido cu Parlamento ta dispuesto pa duna fondonan adicional y pa presupuesto 2020 lo pidi Parlamento cooperacion pa logra e metanan menciona den e otro respuestanan pa logra aumenta e seguridad riba nos isla. Ademas mester renoba e leynan existente pa por conta cu leynan y instrumentonan nobo pa por atende e situacionnan actual na un forma mas eficiente. 

Parlamentario Alan Howell a gradici un biaha mas Minister Andin Bikker pa su respuestanan y a dune y tambe tur e cuerponan di seguridad riba nos isla pa e trabou incansabel cu nan ta realisando pa mehora e nivelnan di seguridad na Aruba.

Related posts

Minister Thijsen a bishita oficina nobo di ATA Europa

EA News Author

Parlamentario Endy Croes: Consentisacion Ta posibel cu un cuidadano por vota AVP ainda?

EA News Author

E virus di Covid-19 lo no desaparese pa awor y e yabi den e pandemia aki ta pa cuida bo mes

EA News Author

Leave a Comment