Politica

Parlamentario Alan Howell ta felicita Cuerpo Policial pa nan tremendo trabou


ORANJESTAD, Aruba

Alan Howell, parlamentario di Fraccion di POR, a felicita Cuerpo Policial pa e gran trabou cu nan ta bin eherciendo. El a indica cu mientras hopi tabata balia y gosa durante parada di Carnaval di mucha na San Nicolas, Cuerpo Policial a haci un tremendo trabou.

“Atraco Team no ta drumi, nan a bolbe canta bingo, a dal duro y esaki nos no ta scucha oposicion ta papia. Ta parse solamente cu ora atraco tuma luga tin celebracion grandi, tin cherchamento y tin sensacion, pero no ta scuchanan papia ora cu Cuerpo Policial ta haciendo un tremendo trabou. Nos di Fraccion POR si ta para tras di Cuerpo Policial, den bon y den malo y nos kier felicita Atraco Team, Cuerpo Policial y Minister di Husticia pa e bon trabou haci”, Alan Howell ta bisa.

E ta agrega cu Parlamento lo sigui sostene Cuerpo Policial den tur loke por haci manera presupuesta mas placa y presupuesta mas material pa nan por sigui bringa criminalidad. Tambe el a bisa cu Cuerpo Policial por sigui depende den tur manera riba Fraccion di POR pa yuda combati criminalidad y sostene Minister di Husticia den e tarea dificil aki. 

Igualmente Howell ta encurasha pueblo pa mira den nan vecindario y si ta sinti cu tin informacionnan clave cu lo por yuda pa soluciona cualkier caso, pa tuma contacto cu Cuerpo Policial, contribuyendo asina aki, den forma anonimo, na mantene nos pais mas sigur cu ta posibel y haya e malechornan tras di trali.

Related posts

Parlamentario Endy Croes: Durante reunion di CITGO Richard Arends hopi nervioso ta tembla y ta gaña so

EA News Author

KvK ta anuncia directiva pa aña 2020: A Elegi Presidente Y Vice-presidente Nobo Di Directiva Di Kvk

EA News Author

Pa Parlamento di Aruba Aña 2020 no tabata facil

EA News Author

Leave a Comment