Mike Eman, Telearuba, 11 juli 2014
Parlamentario Endy Croes a tuma nota cu Minister President Mike Eman a anuncia oficialmente su retiro como Lider di AVP pa september 2026, y como Minister President pa 1 di januari 2027. Un anuncio cu, segun tur indicacion, a cay manera un baño di awa friu pa su mesun coalicion. Manera Minister Gerlien Croes mes a confirma publicamente, e anuncio aki no tabata uno consulta; ni cu FUTURO, ni cu su propio Partijraad. Un Minister President ta anuncia su salida sin un plan, sin un sucesor, y sin coordina cu su partnernan. Esaki no ta entrega un legado, esaki ta abandono di responsabilidad.
E forma di e anuncio ta solamente e mita di e storia. Loke ta preocupa Parlamentario Endy Croes ta e contraste cu loke Mike Eman mes a para y defende den publico.
Na juli 2014, Mike Eman a drenta den un welga di hamber. El a campa dilanti Fort Zoutman, net dilanti di Gabinete di Gobernador, pasobra Rijksministerraad a manda un instruccion na Gobernador pa no firma e presupuesto di Aruba. E debe di Aruba tabata subiendo drasticamente bou di su mesun gobernacion; e deficit di 2014 tabata 443 miyon florin y Hulanda tabata exigi control. E tempo ey, Mike Eman a bisa NO. El a para firme publicamente, y el a duna su palabra na pueblo di Aruba.
Awor, nos mester recorda tambe con Mike Eman a yega na e punto ey. Desde cu el a asumi gobernacion na october 2009, su prome presupuesto pa 2010 ya tabatin un deficit grandi. Aña tras aña, den 2011 y 2012, e deficit aki a keda crece. Tanto Raad van Advies como IMF a manda señalnan fuerte durante 2013, indicando cu e debe nacional di Aruba tabata aumentando demasiado rapido y drasticamente.
Na maart 2013, Mike Eman mes a firma e ‘Witte Donderdag Akkoord’ (Protocol 2013), comprometiendo Aruba pa baha su debe. Pero, tog e presupuesto di 2014 a presenta un deficit di 443 miyon florin, aproba pa su mesun parlamentarionan den Staten. Esaki ta e mesun situacion cu despues a conduci na e famoso welga di hamber
Awe, na 2026, e mesun Mike Eman aki ta forsando su parlamentarionan pa vota NA FABOR di e Rijkswet HOFA. Un ley cu ta pone Aruba bou di exactamente e mesun tipo di supervision financiero di Hulanda cu el a yama un “verkrachting” 12 aña pasa. Y mientrastanto, e mes ta bandonando e barco; sin un plan, sin un sucesor nombra, lagando su coalicion pa deal cu tur e consecuencianan.
Parlamentario Endy Croes no por compronde e actitud di Mike Eman pa cu Hulanda awo. Den 2014 el a uza e palabra ‘verkracht’ pa defende autonomia di Aruba. Den 2026 e mesun lider aki ta entregando e mesun autonomia den man di Hulanda y ta bandona e barco, lagando e pais mes mester deal cu e Hulandesnan. Parlamentario Croes ta expresa cu e decision politico di entrega Aruba su autonomia financiero na Hulanda, via un Rijkswet cu e mes a compara cu ‘verkrachting’, mientras e ta anunciando su salida sin un plan di transicion, ta algo cu pueblo di Aruba mester compronde y evalua pa su mes.
Mike Eman a bolter 180 grado. Pueblo di Aruba tin un solo pregunta pa haci: entre 2014 y 2026, kico exactamente a cambia pa Mike Eman? Pasobra pa Aruba, ora ta trata di e necesidad di proteha nos autonomia, absolutamente nada a cambia.
Fuente di e expresion di Mike Eman:
https://nos.nl/artikel/673801-premier-aruba-in-hongerstaking
https://nos.nl/artikel/2058634-nederland-zat-fout-in-conflict-met-aruba-over-begroting