Politica

Parlamentario Endy Croes: Un Contract desastroso Cu e Termination Agreement Aruba ta sali gana


ORANJESTAD,Aruba

Parlamentario Endy Croes ta splika cu e enfoke di Parlamento ta dirigi actualmente banda di e corona virus pa por trata pronto e ley pa apodera 3 minister pa por firma e “Termination Agreement” y asina Aruba haña e Refineria y e Terminal bek den su poder. Ohala cu den tempo record por haña interesado (nan) serio pa por opera esakinan na un mihor manera benificioso pa Pais Aruba of ken sa cu Gobierno y Consorsionan local como partners?

Aruba no ta perde ningun plaka kibrando e contracto aki:

Parlamentario Endy Croes a splika amplio durante siman alrespecto e 150 miyon dollar di garantia. AVP kier crea un imprecion cu Aruba lo perde di haña e plaka aki of cu Aruba ta regalando CITGO e plaka aki. Encorto PDV Holding a para garantia pa 150 miyon dollar riba papel. Ki ora por apela riba esaki? Solamente si kibra e contracto of momento e contracto termina si a cumpli cu henter e periode di 15 aña. Na e momentonan aki Gobierno tin 12 luna pa dicidi si ta bay desmantela. E momento cu dicidi cu ta bay desmantela anto CITGO lo usa maximo 150 dollar den e proceso aki pa desmantela. Pa tur claridad no ta un plaka cu Aruba lo haña. Gobierno tin e posibilidad di escohe un otro caminda ancra den e contracto “Definitive Participation Agreement” momento tin desacuerdo. E posibilidad aki ta mediante e Umbrella Dispute Settlement Agreement. Si escohe e caminda aki mester cana un caminda largo, complica y costos mediante Negociation-Mitigation-Curing y na final bay Arbitrage. Esaki por dura minimo 5 aña. CITGO lo apela riba artikel 18.1 y 18.3 bou Forsa Majuere den e contracto usando e embargo di OFAC/ USA como Forsa Majeure y Gobierno su chens lo ta hopi chiquito. Supongamos Gobierno gana toch den Arbitrage despues di 5 aña, Gobierno ta gana e derecho pa exigi CITGO pa desmantela y no ta gana of haña ningun plaka. Parlamentario Endy Croes kier pa e esaki ta suficiente kla pa pueblo.  Nos trabou entre otro tambe ta pa  ilustra e politica “barata” cu AVP ta hungando mei mei di un crisis mundial  tratando na bruha pueblo cu gobierno lo ta regalando CITGO 150 miyon dollars of 300 miyon florin.

CITGO tabata cobra Aruba 6 miyon florin pa unload gasoline: 

Parlamentario Endy Croes ta cuestiona masha hopi e forma cu entre otro abogado Sjiemfat a negosha e contractonan aki pa pais Aruba. Dicho abogado a cobra un suma total di rond 5.3 miyon florin for di gobierno. Tambe ta cuestiona masha hopi con Mike Eman, Mike de Meza a firma e contractonan aki totalmente desventahoso pa Aruba. Parlamentario Endy Croes ta duna un ehempel. A duna CITGO tur tur tankinan, pipanan, waf, pumpnan etc esta Refineria y Terminal momento a lease esakinan cu CITGO. FMSA cu ta percura normalmente pa gasoline, diesel, jetfuel por ehempel semper tin su propio tankinan y hasta e tankinan aki a wordo inclui den e lease contract pa CITGO. Consecuentemente ki ora un barco trese gasolin pa Aruba, RDA (Aruba) mester paga CITGO 3.3 us dollar cent pa cada gallon cu wordo gepump di e barco pa e tankinan aki ( tankinan aki tabata di FMSA promer cu e contracto) cual ta suma un balente suma di 6 miyon florin pa aña. Esaki Parlamentario Endy Croes ta considera negosacion di dijaka. Hamas Gobierno mester a acepta un deal asina unda pueblo finalmente mester paga pa un gasolin y diesel mucho mas caro.

Mundo di petrolio tin scarcedad na storage:  Actualmente prijs di crude mundialmente a baha te rond di $20 us dollar pa bari. Esaki consecuentemente a causa cu inversionistanan potencial a cumpra miyones di bari y mester lugar pa store esakinan. Rond mundo tin scarsedad actualmente y te hasta nan ta huur barconan grandi pa “store” e crudonan aki. Aruba tin un Terminal y un cantidad di tanki ( cu por carga miyones di bari) tur para bashi. Ta e momento oportuno pa explora oportunidadnan nobo y briyante pa Aruba.  Terminando e contracto di CITGO awor finalmente lo benificia Aruba enormemente.

Related posts

Parlamentario Endy Croes: Robert Candelaria a bay den Winterslap : Mientras e sospechoso principal Benny Sevinger ta cobrando salario di Parlamentario

EA News Author

Parlamentario Ryçond R. Santos do Nascimento (AVP): Ursell Arends kier spanta balente

EA News Author

Parlamentario Benny Sevinger: Diferente cambionan haci riba refeneria di Aruba

EA News Author

Leave a Comment