Local

Pastor Marcel Balootje: Cuidao cu mal amistad ,e por haci hopi danjo

Pastor

No laga ningun hende gaña boso: Mal compania ta daña bon custumber.Usa boso sano huicio y stop di haci pica, pasobra algun no tin conocemento di Dios,Mi ta bisa esaki pa brongosa boso.( 1 Corintionan 15:33).

Mal amistad por haci daño cu ta dificil pa drecha na bida di un hende, pesey como mayor nos tin e obligacion, di no laga cos bay for di man, y no bisa ta cos di mucha baldadi.

Pasobra baldadi ta bira bandido y bandido ta bira criminal. 

Cos no ta facil den un mundo, malbado, inmoral y perverso, pesey haci tur locual ta posibel pa interveni na tempo den bida di bo yiu, y no laga e enemigo destrui bo yiu. ( Juan 10:10).

Den salmo 101:3-7 cual ta un salmo di promesa na Señor y nos ta spera cu nos hobennan cu lesa y purba imita esaki; 

Lo mi no pone nada malo dilanti di mi wowo.

Mi ta aborece e obra di esnan cu ta desvia, esey lo no tin gara riba mi.

Un curason perverso mester keda leu for di mi.

Mi no kier tin nada di haci cu maldad.

Esun cu ta calumnia su prohimo na secreto lo mi destrui.

Lo mi no soporta ningun hende cu tin mirada altanero, y un curason aogante 

Mi wowonan lo ta riba e fielnan riba e tera, pa nan por biba serca mi.

Esun cu ta cana den caminda di perfecion lo sirbimi.

Esun cu ta practica engaño lo no biba den mi cas.

Esun cu ta papia mentira lo no keda para den mi presencia.

For di e palabranan aki tur hoben por deduci nan amistad y cuminsa para firme y no anda cu hende cu ta hinca den ningun sorto di problema, aleha for di violencia,gang,droga, alcohol, inmoralidad etc.

Bandona e presencia di hende bobo , sino lo bo no diserni palabranan di conocemento ( Proverbionan 14:7).

Mientras cu un hende ta cana cu mal amistad e no por tende di Dios.

Bendiciona ta e hende cu no ta cana den conseho di malbadonan, ni ta para den caminda di pecadornan, ni ta sinta riba stoel di bofonadornan.( Salmo 1:1).

Un hende ta un bofonado ora e sa kico di berdad di Dios ta demanda, pero e ta ninga di aplike.

Beibel ta conta nos cu despues cu Abraham a separa for di Lot Dios a papia cu Abraham.

Lot tabata cana cu Abraham pasobra e tabata sa cu e bendicion di Dios ta riba Abraham, pero Lot tabata materialista.

Tin hopi amistad cu kier beneficia di bo pero nan curason no ta cu bo.

Un amistad cu ta invita bo pa horta, droga, tira atraco, y hasta mata hende , ta mal amistad.

Un amistad cu kier pone bo perde bo dignidad, como un teenager of mucha ta mal amistad.

Un amistad cu ta encurasha bo pa divorcia pasobra e tambe a divorcia ta mal amistad.

Un amistad cu sa masha bon cu bo ta casa, pero ta pusha bo den adulterio ta mal amistad.

Un amistad cu ta conseha bo pa cana riba caya en bes di bay scol ta un mal amistad.

Un amistad cu ta siña bo pa bende bo curpa pa placa ta un mal amistad,

Esun cu anda cu hende sabi lo ta sabi,ma un compañero di hende bobo lo sufri daño.

Cas di malbadonan lo wordo destrui, ma tent di rectonan lo florece.

Ta hopi presion diabolico tin riba e hubentud awendia, pa asina pone nan trompica, y purba di tur manera pa nan no bira e homber y muher integro pa nos comunidad,

Laga nos mantene nos hubentud fuertemente den oracion.

Related posts

Eric Wente a ofrece un lectura special di Wine Tasting na studiantenan di EPI

EA News Author

Prome Minister a splica na varios ocasion con e negosacionnan cu Hulanda ta bayendo

EA News Author

Pastor Marcel Balootje: Ta dificil pa criminalidad baha, si porta di inmoralidad ta hancho habri

EA News Author

Leave a Comment

Whatsapp Message