Awe alrededor di 6 or di atardi Wardakosta a haña un yamada via sentral di polis ku un kantidat di hende a kai den laman na noordkant. E personanan tabata na Watamula i tabata piki kiwa, ora ku nan tur a kai den laman. Di e sinko personanan ku a kai den laman, tres a logra subi tera bèk via di e barankanan. Dos di e personanan no por a logra subi, riba kual polis a alertá Wardakosta. E Sentro Operashonal Marítimo di Wardakosta mesora a saka e helikòpter pa bai Watamula pa saka e dos personanan for di e laman brutu mas lihé posibel. Na yegada, e tripulashon di e helikòpter a hisa e dos personanan sakanan for di awa. Un persona, un hende muhé, tabata inkonsiente na e momentu ei. E otro persona, un hòmber tabata konsiente. Ambos a ser hiba na e punto di sosten di Wardakosta na Hato, unda ku dos ambulans tabata warda nan. E dama a rekobrá su konosementu na yegada na Hato.
Personanan ta kai na awa na Noordkant
